Ўзбекистонда йўл-транспорт ҳодисаларининг олдини олиш мақсадида йўлакларда ҳаракатланувчи пиёдалар учун сариқ жилетлардан фойдаланиш тартиби жорий этилиши ҳақида маълум қилинган эди. ЙҲХХ мазкур хабарлар ёлғон эканини хабар қилди.
Баёнотда Вазирлар Маҳкамасининг 2022 йил 12 апрель кунидаги “Йўл ҳаракати қоидаларини тасдиқлаш тўғрисидаги” 172-сон қарорига мувофиқ, фуқароларнинг, айниқса, болаларнинг йўл-транспорт ҳодисалари ҳамда оқибатларидан ҳимояланганлигини таъминлаш мақсадида сутканинг қоронғи вақтида ва етарлича кўринмайдиган шароитда йўлни кесиб ўтишда ва йўл ёқаларидан ёки қатнов қисмининг четидан ҳаракатланишда, пиёдаларнинг устки кийимида нур қайтарувчи элементлар бўлиши инсон ҳаётини сақлаб қолиш учун муҳим эканлигини кенг тарғиб қилиш бўйича манзилли чора-тадбирларни амалга оширилиши белгиланган бўлиб, яъни ушбу норма тавсиявий аҳамиятга эга эканлиги келтирилган.
Шунингдек, Йўл ҳаракати қоидаларининг 167-бандига кўра, велосипед йўлкаси бўлмаган ҳолда йўлнинг қатнов қисмида ҳаракатланаётган велосипедчилар сутканинг қоронғи вақтида ва етарлича кўринмайдиган шароитда нур қайтаргичли камзулда ёки нур қайтарувчи элементли парчалари бўлган устки кийимда бўлиши шартлиги белгилангани айтилган.
“Жамоатчилик ва ОАВдан турли тахмин ва миш-мишлардан иборат ахборотни тарқатмасликларини сўраймиз”, — дейилади ЙҲХХ хабарида.
Адлия вазирлиги тушинтиришига кўра, мазкур талаб бошқа шахсларга, шу жумладан пиёдалар учун мажбурий эмас, тавсиявий характерга эга.
Шунингдек, қонунчиликда Ички ишлар вазирлиги томонидан пиёдаларнинг қоронғида ҳаракатланаётганда нур қайтарувчи устки кийимда бўлишини тарғиб қилиш йўл транспорт ҳодисаларининг олдини олишда муҳим вазифалардан бири эканлиги қайд этилган.
Изоҳ (0)