Ўзбекистонда Аи-80 бензини учун акциз солиғини “нол” ставкада қўллаш муддати 2023 йил охиригача узайтирилгани бюджет тушумларини 4 триллион сўмдан кўпроққа камайтириши мумкин. Бу ҳақда иқтисодчи Отабек Бакиров Telegram'даги каналида пост қолдирди.
Фото: “Дарё”
Республикада 2022 йил 10 декабрдан бошлаб амал қилаётган Аи-80 русумли автобензин учун акциз солиғини “ноль” ставкада қўллаш муддати 2023 йил 1 март куни якунига етиши керак эди.
Президент Шавкат Мирзиёев томонидан 28 февраль куни имзоланган қарорга мувофиқ, Аи-80 русумли автобензин маҳсулоти учун акциз солиғини “ноль” ставкада қўллаш муддати 2023 йил 31 декабрга қадар узайтирилди.
Отабек Бакиров фикрича, акциз солиғига чексиз муддат имтиёз бериш нархлар ўсишини тўхтатиб қола олмайди, нархларни тиювчи асосий омил рақобат муҳити шаклланишидир.
“Бюджет параметрларига кўра, 1 февралдан 10 фоизга индексациялангани, шунингдек, импорт, ишлаб чиқаришдаги ҳамда якуний истеъмолчига сотишдаги асосий бензин Аи-80 экани назарда тутилса, йил охиригача ноллаштириш қиймати бюджет учун 4 триллион сўмдан кўпроққа айланиши мумкин.
2022 йил якунлари бўйича нефть маҳсулотларидан 576,6 миллиард сўм, охирги истеъмолчига реализация қилишдан 3 387,9 миллиард сўм акциз солиғи йиғилган. Албатта, нархларни барқарорлаштириш учун бу керакли фавқулодда чора. Лекин рақобатни қўллаб-қувватлаш, импортчилар сони кўпайишини рағбатлантириш, нотариф ва техник талабларни юмшатиш масалаларига ҳам эътибор бўлиши зарур.
Алалоқибат ишлаб чиқариш, импорт, улгуржи ва чакана савдодаги монополлашган вазиятда акцизга чексиз муддат имтиёз бериш нархлар ўсишини тўхтатиб қололмайди, ўрта ва узоқ муддатли истиқболда нархларни тиювчи бош омил бу рақобат муҳитини шакллантириш бўлиши зарур”, – деб ёзган иқтисодчи.
Эслатиб ўтамиз, “Ўзбекнефтгаз”га қарашли барча АЁҚШларда 13 декабрь соат 00:00 дан бошлаб Аи-80 бензини нархи бир литри учун 5700 сўмдан сотила бошланган.
Мавзуга доир:
Аи-80 нархлари ошиши кутилмоқда: Тошкентда кунлик бензин нархлари эълон қилинди
Изоҳ (0)