Тошкент шаҳри Чилонзор туманидаги 181-мактабнинг 9-синф ўқувчилари сувенир долларни сочиб, рақсга тушгани акс этган видео ижтимоий тармоқларда тарқалди. Пойтахт Халқ таълими бош бошқармаси ҳолат юзасидан муносабат билдирди.
Ишчи гуруҳ томонидан ўтказилган ўрганишга кўра, мактабнинг тўрт нафар ўқувчиси — М.М., Х.М., Д.М. ва И.М. дарсдан кейин синфхонада хорижнинг сувенир пулларини сочиб, видеолавҳа тасвирида иштирок этган. Уларнинг синфдоши I.С. эса ҳолатни видеотасвирга олиб, TikTok саҳифасига юклаган.
28 февраль куни мазкур таълим муассасасида ўқувчилар ва уларнинг ота-оналар иштирокида профилактик суҳбат ўтказилган. Унда туман халқ таълими бўлими вакиллари, маҳалла фаоллари, Ёшлар ишлари агентлиги туман бўлими раҳбари Б. Зиёвиддинов, ички ишлар органи XPБ инспектори, психолог майор С.Нуриддинов қатнашган. Йиғилишда ўқувчи-қизларнинг юқоридаги хатти-ҳаракати одоб-ахлоқ қоидаларига зид экани, миллий урф-одатларга тўғри келмаслиги яна бир бор тушунтириб ўтилган.
Шунингдек, мактаб директори М.Сабурова сўзга чиқиб, Халқ таълими вазирлигининг “Одоб-ахлоқ ва ички тартиб қоидалари тўғрисида”ги буйруғи ҳақида тушунтириб ўтган ва ўқувчиларни бундай ҳолатни бошқа такрорланмаслиги бўйича огоҳлантирган. ”Мақтанчоқ ўқувчи қизлар” видеолавҳасида қатнашган 9-“Б” синф ўқувчиси М.М.нинг онаси М.Н. сўз олиб, ўқувчи-қизларнинг чуқур моҳиятини англамасдан видео тарқатганликлари учун ота-оналар номидан мактаб маъмуриятидан узр сўраган.
Изоҳ (0)