Тошкент вилояти Ўрта Чирчиқ туманида эркак келишмовчилик сабаб онасини уйга киритмади. Бу ҳақда МИБ ахборот хизмати “Дарё”га хабар берди.
Хабарга кўра, 27 февраль куни YouTube ижтимоий тармоғида “МИБ ноқонуний тарзда фуқаронинг уйига тажовуз қилмоқда” номли бюронинг Ўрта Чирчиқ туман бўлими ходимлари томонидан мажбурий кўчириш ҳаракати олиб бораётгани ҳақида видеохабарлар жойлаштирилди.
Фуқаролик ишлари бўйича Ўрта Чирчиқ туманлараро судининг 2022 йил 10 августдаги ижро варақасига асосан қарздор Д.С.дан ундирувчи П.А.ни (она ва бола) Ўрта Чирчиқ тумани, “Туркистон” МФЙ, Туркистон кўчасидаги хонадонларнинг бирига барча ёрдамчи бинолар ва коммунал хизматлардан фойдаланиш ҳуқуқи билан яшаш учун киритиш тўғрисидаги ижро ҳужжати бўлим иш юритувига 2023 йил 7 январь куни келиб тушган. Шу куни ижро иши юритишни қўзғатиш тўғрисидаги қарор қабул қилинган.
Ижро ҳужжатининг ижросини таъминлаш мақсадида 24 февралда тегишли ташкилотларга ундирувчи П.А.ни ижро ҳужжатида кўрсатилган манзилга мажбурий тартибда киритиш тўғрисида талабнома берилган. 27 февраль куни Ўрта Чирчиқ тумани, “Туркистон” МФЙ, Туркистон кўчаси 59-уйга холислар ҳамда тегишли ташкилотлар ходимлари билан чиқилганда хонадон эшиклари қулфлангани аниқланиб, ижро ҳаракатлари кейинга қолдирилгани тўғрисида далолатнома расмийлаштирилди.
Изоҳ (0)