Markaziy bank 2023-yil 1-fevral holatiga ko‘ra banklarning muammoli kreditlari to‘g‘risida ma’lumot berdi.
Unga ko‘ra, banklardagi jami kredit portfeli 391,1 trln so‘mga yetgan. Bu o‘tgan oyga nisbatan 1,1 trln so‘mga ko‘proq degani.
Yanvar oyida banklardagi umumiy muammoli kreditlar (NPL) miqdori qariyb 920 mlrd so‘mga ko‘payib, 14,9 trln so‘mni tashkil qilgan. Muammoli kreditlar to‘rt oy ichida ilk bor ko‘paydi. Ularning umumiy miqdori oxirgi marta avgust oyida 500 mlrd so‘mga ko‘paygan edi.
O‘tgan oyda umumiy kredit portfelidagi NPL ulushi 0,2 foizga ko‘tarilib, 3,8 foiz bo‘lib turibdi.
Banklar orasida NPL miqdori eng ko‘p “Milliy bank”da saqlanib qolmoqda va o‘tgan oyga nisbatan 4 mlrd so‘mga ko‘paygan — 2,6 trln so‘m.
NPL ulushi bo‘yicha eng baland ko‘rsatkich hamon “O‘zagroeksporbank”da — bankning jami kreditlardagi NPL ulushi 96,8 foizni tashkil qildi.
Izoh (0)