Тўрт ой ичида илк бор: Ўзбекистондаги банкларда муаммоли кредитлар кўпайди 

Марказий банк 2023 йил 1 февраль ҳолатига кўра банкларнинг муаммоли кредитлари тўғрисида маълумот берди.

Унга кўра, банклардаги жами кредит портфели 391,1 трлн сўмга етган. Бу ўтган ойга нисбатан 1,1 трлн сўмга кўпроқ дегани. 

Январь ойида банклардаги умумий муаммоли кредитлар (NPL) миқдори қарийб 920 млрд сўмга кўпайиб, 14,9 трлн сўмни ташкил қилган. Муаммоли кредитлар тўрт ой ичида илк бор кўпайди. Уларнинг умумий миқдори охирги марта август ойида 500 млрд сўмга кўпайган эди. 

Ўтган ойда умумий кредит портфелидаги NPL улуши 0,2 фоизга кўтарилиб, 3,8 фоиз бўлиб турибди.

Банклар орасида NPL миқдори энг кўп “Миллий банк”да сақланиб қолмоқда ва ўтган ойга нисбатан 4 млрд сўмга кўпайган — 2,6 трлн сўм. 

NPL улуши бўйича энг баланд кўрсаткич ҳамон “Ўзагроэкспорбанк”да — банкнинг жами кредитлардаги NPL улуши 96,8 фоизни ташкил қилди.