Prezident Shavkat Mirziyoyevning “Kasanachilikni yana-da rivojlantirishga oid qo‘shimcha chora-tadbirlar to‘g‘risida”gi qaroriga ko‘ra O‘zbekistonda kasanachilikni qo‘llab-quvvatlash jamg‘armasi tashkil etiladi. Bu haqda “Daryo”ga Kambag‘allikni qisqartirish va bandlik vazirligi axborot xizmati xabar berdi.
Taʼkidlanishicha, qaror bilan ish beruvchilarga o‘zini o‘zi band qilgan shaxslarni kasanachi sifatida jalb qilishga ruxsat berilgan.
“Shunga ko‘ra, o‘zini o‘zi band qilgan shaxslar shug‘ullanishi mumkin bo‘lgan faoliyat 19 taga oshdi. 2023-yil 1-martdan 2026-yil 1-yanvargacha uch oydan ko‘p 30 tadan ortiq kasanachilarni jalb qilgan va u asosida ishlab chiqargan mahsulotlardan olgan daromadi jami daromadining 60 foizidan ko‘pni tashkil etgan tadbirkorlarga imtiyozlar beriladi. Bunday tadbirkorlarning foyda va aylanmadan olinadigan soliq bazasi 50 foizga kamaytirilib hisoblanadi; ayrim davlat mulklaridan foydalanganlik uchun ijara to‘lovi 50 foiz miqdorda belgilanadi; davlat xaridlari doirasida tuziladigan shartnomalarda buyurtmachilar tomonidan 50 foiz oldindan to‘lov amalga oshiriladi.
2023-yil 1-martdan boshlab Kasanachilikni qo‘llab-quvvatlash jamg‘armasi hisobidan tadbirkorlarga har bir kasanachining dastlabki uch oy davomidagi faoliyati uchun bir oylik daromadi miqdorida bir martalik subsidiya ajratiladi.
“Shuningdek 2025-yil 1-yanvargacha kasanachilik bilan shug‘ullanayotgan ishsiz va ish qidirayotgan, ijtimoiy daftarlarga kiritilgan fuqarolarga asbob-uskunalar va xomashyo xarid qilish uchun BHMning 30 baravarigacha, kasanachilik asosida uyda ishlayotgan nogironlarning ish joyini moslashtirish uchun BHMning 40 baravarigacha, kasanachilarni kasb-hunarga o‘qitish uchun BHMning 2 baravarigacha, hokim yordamchilari tavsiyasi asosida tadbirkorlarga aylanma mablag‘larini to‘ldirish uchun har bir kasanachi uchun 2 million so‘mgacha, jami 300 million so‘mgacha yillik 14 foiz, 6 oygacha imtiyozli davr bilan 3 yilgacha kredit ajratiladi. Jamg‘arma hisobidan har bir kasanachi uchun 1 million so‘mgacha, jami 150 million so‘mgacha 2 yilgacha muddatga foizsiz ssuda ajratiladi. 2023-yil 1-iyungacha davlat ulushi mavjud savdo majmualari va dehqon bozorlarida hunarmandchilik va kasanachilik rastalari tashkil etiladi”, — deydi vazirlik axborot xizmati masʼuli.
Izoh (0)