Президент Шавкат Мирзиёевнинг “Касаначиликни яна-да ривожлантиришга оид қўшимча чора-тадбирлар тўғрисида”ги қарорига кўра Ўзбекистонда касаначиликни қўллаб-қувватлаш жамғармаси ташкил этилади. Бу ҳақда “Дарё”га Камбағалликни қисқартириш ва бандлик вазирлиги ахборот хизмати хабар берди.
Таъкидланишича, қарор билан иш берувчиларга ўзини ўзи банд қилган шахсларни касаначи сифатида жалб қилишга рухсат берилган.
“Шунга кўра, ўзини ўзи банд қилган шахслар шуғулланиши мумкин бўлган фаолият 19 тага ошди. 2023 йил 1 мартдан 2026 йил 1 январгача уч ойдан кўп 30 тадан ортиқ касаначиларни жалб қилган ва у асосида ишлаб чиқарган маҳсулотлардан олган даромади жами даромадининг 60 фоизидан кўпни ташкил этган тадбиркорларга имтиёзлар берилади. Бундай тадбиркорларнинг фойда ва айланмадан олинадиган солиқ базаси 50 фоизга камайтирилиб ҳисобланади; айрим давлат мулкларидан фойдаланганлик учун ижара тўлови 50 фоиз миқдорда белгиланади; давлат харидлари доирасида тузиладиган шартномаларда буюртмачилар томонидан 50 фоиз олдиндан тўлов амалга оширилади.
2023 йил 1 мартдан бошлаб Касаначиликни қўллаб-қувватлаш жамғармаси ҳисобидан тадбиркорларга ҳар бир касаначининг дастлабки уч ой давомидаги фаолияти учун бир ойлик даромади миқдорида бир марталик субсидия ажратилади.
“Шунингдек 2025 йил 1 январгача касаначилик билан шуғулланаётган ишсиз ва иш қидираётган, ижтимоий дафтарларга киритилган фуқароларга асбоб-ускуналар ва хом ашё харид қилиш учун БҲМнинг 30 бараваригача, касаначилик асосида уйда ишлаётган ногиронларнинг иш жойини мослаштириш учун БҲМнинг 40 бараваригача, касаначиларни касб-ҳунарга ўқитиш учун БҲМнинг 2 бараваригача, ҳоким ёрдамчилари тавсияси асосида тадбиркорларга айланма маблағларини тўлдириш учун ҳар бир касаначи учун 2 миллион сўмгача, жами 300 миллион сўмгача йиллик 14 фоиз, 6 ойгача имтиёзли давр билан 3 йилгача кредит ажратилади. Жамғарма ҳисобидан ҳар бир касаначи учун 1 миллион сўмгача, жами 150 миллион сўмгача 2 йилгача муддатга фоизсиз ссуда ажратилади. 2023 йил 1 июнгача давлат улуши мавжуд савдо мажмуалари ва деҳқон бозорларида ҳунармандчилик ва касаначилик расталари ташкил этилади”, — дейди вазирлик ахборот хизмати масъули.
Изоҳ (0)