Кешбэк олиш учун Face ID тизимидан ўтиш талаби жорий этилди

“Солиқ” иловасида рўйхатдан ўтказилган чеклар учун кешбэк олишда Face ID бўйича идентификация қилиш талаби жорий этилди. Бу ҳақда Солиқ қўмитасининг матбуот хизмати хабар бермоқда.

Бу жараён иловадаги шахсий ҳисоб орқали Face ID бўлимида амалга оширилади. Бунда шахсий идентификация рақамини (ЖШШИР) киритиш, кейин юзни тўлиқ суратга олиш ва уни тасдиқлаш учун юбориш керак.

Шу пайтга қадар 500 минг сўмдан ортиқ маблағни ҳисобга ўтказиш учун фақат фотосурат ёрдамида шахсни тасдиқлаш талаб қилинарди. Энди бу шарт ҳар қандай бонус миқдори учун амал қилади.

Маълумот учун, январь ойида чеклари энг кўп рўйхатдан ўтказилган компаниялар орасида Korzinka етакчилик қилмоқда — 2,6 миллион дона чек. Korzinkaъдан сотиб олинган маҳсулотларга 3,7 млрд сўм кешбэк берилган. 

Иккинчи ўринда Havas чеклари (1,3 миллион дона, кешбэк суммаси 703,1 млн сўм) қайд этилган бўлса, UNG Petro чеклари (594,5 минг та чек, кешбэк суммаси 2,7 млрд сўм) учинчи бўлган.