Samarqand shahrida mehmonxona tomonidan 7,6 milliard so‘mlik elektr energiyasidan noqonuniy foydalanib kelinayotgani aniqlandi. Bu haqda Energetika vazirligi axborot xizmati xabar berdi.
Xabarga ko‘ra, Energetika vazirligi huzuridagi “O‘zenergoinspeksiya” va huquqni muhofaza qiluvchi organlar bilan birgalikda o‘tkazilayotgan nazorat tadbirlari davomida So‘g‘diyona mavzesida faoliyat yuritib kelayotgan mehmonxonada elektr energiyasidan noqonuniy foydalanish holati aniqlandi.
Ushbu tadbirkorlik subyektiga tegishli mehmonxonada yashirincha o‘rnatilgan o‘chirgich orqali elektr hisoblash tizimiga tashqi ta’sir ko‘rsatilgani ma’lum bo‘ldi. Natijada iste’molchiga 16,9 million kVt/soat hisobga olinmagan elektr energiyasi bo‘yicha 7,6 milliard so‘m miqdorida qayta hisob-kitob ishlari amalga oshirildi.
Ushbu hajmdagi elektr energiyasi o‘rtacha 85 mingta xonadonning bir oylik iste’molini tashkil qiladi. Qoidabuzar iste’molchiga nisbatan belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi. Nazorat tadbirlari davom etmoqda.
Izoh (0)