Qoraqalpog‘istonning Nukus shahrida 21-fevral kuni 26 yoshli yigit olib qochilgan mashinada YTHga uchradi. Bu haqda Tergov departamenti axborot xizmati xabar berdi.
Xabarga ko‘ra, 21-fevral kuni soat 07:40 larda Nukus shahri 27-kichik tumanida yashovchi 43 yoshli J.R. ichki ishlar organlarining 102 qisqa raqamiga murojaat qilib, shu kuni uning uyi oldida noma’lum shaxs unga tegishli bo‘lgan “Niva” mashinasini olib qochganini ma’lum qilib, ushbu noma’lum shaxsga nisbatan qonuniy chora ko‘rishni va avtomashinasini topishda amaliy yordam berishni so‘ragan.
Olib borilgan tergov-tezkor harakatlar natijasida, ushbu avtomashinani noma’lum shaxs shahar hududida boshqarib kelayotgan vaqtida aniqlangan. Ichki ishlar xodimlari tomonidan mashinani to‘xtatish talab qilinganda, ularning qonuniy talablarini bajarishdan bo‘yin tovlagan holda IIO xodimlaridan qochishga harakat qilgan. Shu vaqt boshqaruvni yo‘qotib, temir darvozaga borib urilgan va u xodimlar tomonidan ushlangan.
Uning shaxsiga aniqlik kiritilganida, Qo‘ng‘irot tumanida yashovchi 26 yoshli I.N. ekani va ushbu jinoyatni mast holatda sodir etgani aniqlangan.
Mazkur holat yuzasidan Nukus shahar IIO FMB huzuridagi Tergov bo‘limi tomonidan I.N.ga nisbatan Jinoyat kodeksning 267-moddasi 1-qismi (transport vositasini olib qochish) bilan jinoyat ishi qo‘zg‘atilib, gumonlanuvchi protsessual tartibda ushlangan. Hozirda tergov harakatlari olib borilmoqda.
Izoh (0)