Самарқанд шаҳрида меҳмонхона томонидан 7,6 миллиард сўмлик электр энергиясидан ноқонуний фойдаланиб келинаётгани аниқланди. Бу ҳақда Энергетика вазирлиги ахборот хизмати хабар берди.
Хабарга кўра, Энергетика вазирлиги ҳузуридаги “Ўзэнергоинспекция” ва ҳуқуқни муҳофаза қилувчи органлар билан биргаликда ўтказилаётган назорат тадбирлари давомида Сўғдиёна мавзесида фаолият юритиб келаётган меҳмонхонада электр энергиясидан ноқонуний фойдаланиш ҳолати аниқланди.
Ушбу тадбиркорлик субъектига тегишли меҳмонхонада яширинча ўрнатилган ўчиргич орқали электр ҳисоблаш тизимига ташқи таъсир кўрсатилгани маълум бўлди. Натижада истеъмолчига 16,9 миллион кВт/соат ҳисобга олинмаган электр энергияси бўйича 7,6 миллиард сўм миқдорида қайта ҳисоб-китоб ишлари амалга оширилди.
Ушбу ҳажмдаги электр энергияси ўртача 85 мингта хонадоннинг бир ойлик истеъмолини ташкил қилади. Қоидабузар истеъмолчига нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилди. Назорат тадбирлари давом этмоқда.
Изоҳ (0)