Qoraqalpog‘istonning Nukus shahrida aka-uka o‘simliklar uchun ishlatiladigan moddadan zaharlandi. Respublika prokuraturasi holat yuzasidan munosabat bildirdi.
Qayd etilishicha, 27-yanvar kuni soat 08:40 da 2020-yili tug‘ilgan voyaga yetmagan M.A va uning 2004-yilda tug‘ilgan akasi B.B. respublika shoshilinch tez tibbiy yordam ilmiy markazining hududiy filialiga zaharlanish tashxisi bilan tushgan.
Ko‘rsatilgan shoshilinch tibbiy yordamga qaramasdan, voyaga yetmagan M.A. shu kuni shifoxonada vafot etgan, uning akasi B.B. ko‘rsatilgan tibbiy muolajalardan keyin sog‘ayib, 30-yanvarda uyiga ruxsat berilgan. Voyaga yetmagan B.B. kasalxonada shifokorlarga 25-yanvar kuni oziq-ovqat do‘konidan tez tayyorlanadigan lapsha sotib olib, ukasi bilan birga iste’mol qilganini aytgan.
Mazkur ma’lumotlarning haqqoniyligi qonunda belgilangan tartibda tekshirilmasdan turib, 28-yanvar kuni ijtimoiy tarmoqlarda noto‘g‘ri xabarlar tarqatilgan. Prokuratura organlari tomonidan tegishli mutaxassislar ishtirokida o‘tkazilgan tekshirishda lapsha muvofiqlik sertifikatiga ega ekani ma’lum bo‘lib, ular tarkibida toksik elementlar aniqlanmagan.
Mazkur holat bo‘yicha 27-yanvarda Nukus shahar prokuraturasi tomonidan olib borilgan tergovga qadar tekshiruv harakatlari davomida zaharlangan fuqarolar xonadoni ko‘zdan kechirilganda, omborxonada saqlanayotgan qopda o‘tkir hidli modda borligi aniqlanib, ashyoviy dalil tariqasida olingan.
Sud-tibbiyot ekspertizasi xulosasiga ko‘ra, M.A.ning o‘limi organofosfor birikmasi (sipermetrin) bilan o‘tkir zaharlanish va nafas olish yetishmovchiligidan kelib chiqqani, qonida topilgan sipermetrin moddasi marhumning uyidan ashyoviy dalil tariqasida olingan modda tarkibi bilan bir xil ekani aniqlangan. Voyaga yetmagan B.B.ga nisbatan o‘tkazilgan ekspertiza xulosasida ham, u aynan sipermetrin moddasi ta’sirida zaharlangani ko‘rsatilgan.
Holat yuzasidan so‘ralgan voyaga yetmagan B.B. o‘z ko‘rsatmasida otasi Q.B.ning ko‘rsatmasiga asosan, 25-yanvar kuni uyining ichki qismi va atrofiga kemiruvchilarga qarshi o‘tkir hidli modda sepib chiqqanini bayon qilgan. Tergovga qadar tekshiruv davomida xonadon egasi Q.B. o‘g‘li B.B.ning ko‘rsatmalarini tasdiqlab, o‘g‘li sepganidan keyin qolgan moddalarni qopi bilan omborxonasiga saqlash uchun qo‘yganini bayon qilib, holat yuzasidan hech kimga e’tirozi yo‘qligini bildirgan. Tergovga qadar tekshiruv natijasiga ko‘ra, 22-fevral kuni jinoyat ishini qo‘zg‘atishni rad qilish haqida qaror qabul qilingan.
Izoh (0)