Қорақалпоғистоннинг Нукус шаҳрида 21 февраль куни 26 ёшли йигит олиб қочилган машинада ЙТҲgа учради. Бу ҳақда Тергов департаменти ахборот хизмати хабар берди.
Хабарга кўра, 21 февраль куни соат 07:40 ларда Нукус шаҳри 27-кичик туманида яшовчи 43 ёшли Ж.Р. ички ишлар органларининг 102 қисқа рақамига мурожаат қилиб, шу куни унинг уйи олдида номаълум шахс унга тегишли бўлган “Нива” машинасини олиб қочганини маълум қилиб, ушбу номаълум шахсга нисбатан қонуний чора кўришни ва автомашинасини топишда амалий ёрдам беришни сўраган.
Олиб борилган тергов-тезкор ҳаракатлар натижасида, ушбу автомашинани номаълум шахс шаҳар ҳудудида бошқариб келаётган вақтида аниқланган. Ички ишлар ходимлари томонидан машинани тўхтатиш талаб қилинганда, уларнинг қонуний талабларини бажаришдан бўйин товлаган ҳолда ИИО ходимларидан қочишга ҳаракат қилган. Шу вақт бошқарувни йўқотиб, темир дарвозага бориб урилган ва у ходимлар томонидан ушланган.
Унинг шахсига аниқлик киритилганида, Қўнғирот туманида яшовчи 26 ёшли И.Н. экани ва ушбу жиноятни маст ҳолатда содир этгани аниқланган.
Мазкур ҳолат юзасидан Нукус шаҳар ИИО ФМБ ҳузуридаги Тергов бўлими томонидан И.Н.га нисбатан Жиноят кодекснинг 267-моддаси 1-қисми (транспорт воситасини олиб қочиш) билан жиноят иши қўзғатилиб, гумонланувчи процессуал тартибда ушланган. Ҳозирда тергов ҳаракатлари олиб борилмоқда.
Изоҳ (0)