Ukraina armiyasida sapyorlar yetishmayotgani hamda Rossiyaning ehtimoli salbiy munosabatidan cho‘chib NATO o‘z mutaxassislarini jo‘nata olmasligi sabab Polsha minalardan tozalash bo‘yicha yashirin operatsiya uchun Ukrainaga professional politsiyachilar otryadini yuborgan. Bu haqda Wirtualna Polska xabar bermoqda.
Missiya Ukraina hukumati Yevropa Ittifoqining aksilterror bo‘linmalari assotsiatsiyasiga (ATLAS) a’zo mamlakatlarga sapyorlar yuborish so‘rovi bilan murojaat qilganidan keyin boshlangan. 38 davlatdan faqat Polsha bunga rozi bo‘lgan. Polsha ichki ishlar vaziri Mariush Kaminskiy topshirig‘iga ko‘ra gumanitar politsiya kontingenti tuzilgan, uning tarkibiga operatsiyada ixtiyoriy ravishda ishtirok etishni istagan aksilterror politsiyasining alohida bo‘linmalari xodimlari, jami — 98 kishi kiritilgan.
Nashrning ta’kidlashicha, xavfsizlik nuqtai nazaridan operatsiya haqida sapyorlar Polshaga qaytganidan keyingina xabar berilgan.
Sapyorlardan tashqari, guruh tarkibiga feldsherlar va missiya a’zolarini qo‘riqlash uchun “jangovar guruh a’zolari” kirgan, shuningdek, ular minalarni topishga o‘rgatilgan ikkita itni ham olib ketishgan. Missiya oktabr oyi boshida Ukrainaga borib, mamlakatda besh oycha qolgan.
Polshadan kelgan gumanitar missiya jami 342 ming kvadrat metrdan ortiq maydonni, shu jumladan 17,5 ming metr yo‘llarni snaryadlardan tozalab, 2 mingga yaqin xavfli moddalarni zararsizlantirgan. Polsha politsiyasi xodimlari, jumladan, Kiyev, Dnepr va boshqa joylarda ishlagan. Operatsiya davomida missiya a’zolaridan hech kim jabrlanmagan.
23-fevral, payshanba kuni missiya a’zolarini Polsha prezidenti Anjey Duda va Ichki ishlar vazirligi rahbari qabul qiladi, deb qayd etmoqda Rzeczpospolita.
Izoh (0)