Rossiya Federatsiyasi Kommunistik partiyasidan Samara viloyat dumasi deputati Mixail Abdalkin Vladimir Putinning Federal kengashga murojaatini qulog‘iga lag‘mon ilgan holda tomosha qildi. Uning holati aks etgan video tarqalgach, deputat partiya rahbariyati tomonidan tanqid qilindi.
Abdalkinning o‘zi videoni ijtimoiy tarmoqlardagi shaxsiy sahifalariga joylagan. U murojaatni viloyat dumasidagi Kommunistik partiya fraksiyasi rahbariyatining iltimosiga ko‘ra tomosha qilganini ta’kidladi. “To‘liq qo‘llab-quvvatlayman, to‘liq qo'shilaman, ajoyib chiqish. So‘nggi 23 yil ichida bunday gaplarni eshitmagandim. Hayratdaman”, — deya izoh qoldirgan deputat videoga.
Kommunistik partiya fraksiyasi matbuot xizmati rahbari Aleksandr Yushenko “Gazeta.ru”ga bergan intervyusida Abdalkinning qilmishini “ahmoqlik” deb baholadi va uni internetda “tezda mashhurlikni qo‘lga kiritish” istagida aybladi. Yushenko bu ish Samara viloyat dumasidagi Kommunistik partiya fraksiyasi rahbariyatining “e’tiboridan chetda qolmasligiga” va’da berdi.
Kommunistik partiya rahbari Gennadiy Zyuganov duma yig‘ilishida Putinning murojaatini olqishlab, prezident ko‘rsatgan “ishonch va realizm”ni qayd etib, bundan keyin prezidentga qarshi “hujumlar” bo‘lmasligini ta’kidlagan. “Yagona Rossiya” deputati Aleksandr Xinshteyn Zyuganovning so‘zlari kontekstida Abdalkinni “jilovini tortib qo‘yishni” talab qilgan.
Izoh (0)