Arab davlatlari Isroil armiyasining Iordan daryosi g‘arbiy sohilida joylashgan Nablus shahrida falastinliklarga qarshi uyushtirgan jazo reydini qoralab chiqdi.
Saudiya Arabistoni, Qatar, Birlashgan Arab Amirliklari, Kuvayt, Ummon, Misr, Tunis davlatlari Isroil armiyasining Nablusdagi harakatlarini qoraladi — reydda 11 falastinlik halok bo‘lgan, 100 dan ortiq kishi yaralangan.
Arab parlamenti, Arab davlatlari ligasi va Fors ko‘rfazidagi arab davlatlari hamkorlik kengashi Isroilni xalqaro huquqni qo‘pol ravishda buzganlikda va Falastin hududlarida keskinlikni kuchaytirganlikda aybladi.
Isroil armiyasining Nablusdagi falastinliklarga qarshi reydi
22-fevral kuni Isroil mudofaa kuchlari okkupatsiya qilingan G‘arbiy sohil shimolidagi Nablus shahrida navbatdagi reyd davomida falastinliklarga qarshi qurol ishlatdi. Bosqinda 11 falastinlik o‘ldirildi, 100 dan ortiq kishi yaralandi.
Isroil harbiylari shaharga bir necha tomondan bostirib kelgan. Ular eski shahar hududidagi uylardan birini o‘rab olgach, tartibsizliklar boshlangan.
Falastin Sog‘liqni saqlash vazirligining ma’lum qilishicha, yaradorlar yaqin atrofdagi shifoxonalarga yetkazilgan. Olti nafar yaradorning ahvoli og‘ir deb baholanmoqda. Vazirlikning qayd etishicha, 2023-yil boshidan buyon isroilliklar tomonidan o‘ldirilgan falastinliklar soni 62 nafarga yetgan.
Falastinning WAFA axborot agentligiga ko‘ra, jarohatlanganlar orasida ikki jurnalist ham bor.
Ayni paytda Isroil armiyasi Nublusdagi Eski shahar hududida reyd o‘tkazilgani haqidagi ma’lumotni tasdiqladi. Tel-Aviv da’vo qilishicha, harbiylar uch nafar gumonlanuvchi bo‘lgan uyni o‘rab olgan va ularni “zararsizlantirgan”. Isroil ommaviy axborot vositalari Falastinning qasos olish ehtimoli tufayli mamlakatda xavfsizlik kuchayganini xabar qildi.
Falastin maʼmuriyati Isroil tomonidan sodir etilgan jinoyatlar yuzasidan Falastin xalqini xalqaro himoya qilish uchun BMT Xavfsizlik Kengashi, Arab davlatlari ligasi va Islom hamkorlik tashkilotini favqulodda yig‘ilish o‘tkazishga chaqirdi.
Izoh (0)