AQSHning Missisipi shtati qonun chiqaruvchi organi O‘zbekiston bilan hamkorlikni qo‘llab-quvvatlovchi maxsus rezolyutsiyani qabul qildi.
Xabarga ko‘ra, O‘zbekiston elchisi Javlon Vahobov AQSHning Missisipi shtati Senati va Vakillar palatasining navbatdan tashqari sessiyalarida ishtirok etdi. Unda qonunchilar bir ovozdan Shtat milliy gvardiyasi va O‘zbekiston o‘rtasidagi hamkorlikning 10 yilligi, shuningdek, respublika bilan hamkorlikni kengaytirishni qo‘llab-quvvatlashga bag‘ishlangan rezolyutsiyaning qabul qilinishini yoqlab ovoz berdi.
Missisipi Qonunchilik palatalarining alohida sessiyalarida general Jenson Boyles boshchiligidagi Shtat milliy gvardiyasi vakillari, Missisipi gubernatorining o‘rinbosari va Senat prezidenti Delbert Xosemann, Vakillar palatasi spikeri Filip Gunn, Quyi palataning Mudofaa qo‘mitasi raisi va aʼzolari, shuningdek, shtatning qonun chiqaruvchilari hamda ommaviy axborot vositalari vakillari ishtirok etdi.
Sessiyalarda Missisipi qonun chiqaruvchi organi vakillari — deputat va senatorlarga O‘zbekiston hamda Missisipi Milliy gvardiyasi birgalikda 10 yil davomida o‘tkazilgan ko‘plab tadbirlar mazmun-mohiyati alohida taʼkidlangan rezolyutsiyani o‘qib berdi. Bundan tashqari, 2019-yildan boshlab to‘rt yil ketma-ket O‘zbekiston vakillari Missisipi shtatida har yili o‘tkaziladigan “Yujniy udar” mashg‘ulotlarida qatnashib, so‘nggi uch yil ichida “Best Warrior” tanlovida ham g‘olib bo‘ldi.
Shuningdek, 2022-yilda Missisipi Milliy gvardiyasi aynan O‘zbekiston bilan samarali hamkorlik qilgani uchun “Yil hamkorligi” nominatsiyasida ikkinchi o‘rin bilan taqdirlangani ham qayd etilgan.
Rezolyutsiyada O‘zbekiston va Missisipi Milliy gvardiyasi o‘rtasidagi hamkorlik muhimligi ham o‘z ifodasini topgani holda ikki tomonlama aloqalarning yanada kengayishiga umid bildirilgan. Missisipi shtati qonun chiqaruvchi palatalari yig‘ilishlari yakunlariga ko‘ra, deputatlar va senatorlar rezolyutsiyani yoqlab ovoz berishdi. Qonunchilik hujjatining asl nusxasi O‘zbekiston elchisi Javlon Vahobovga topshirildi.
Izoh (0)