Qarshida yangi sotib olingan Cobalt’ning nuqsonlari chiqqani bois u boshqasiga almashtirib berildi. Bu haqda Iste’molchilar huquqlarini himoya qilish jamiyatlari federatsiyasi xabar berdi.
Qayd etilishicha, Qarshi shahrida yashovchi fuqaro H.O‘.ning UzAvtoMotors tomonidan ishlab chiqarilgan Cobalt rusumli avtomashinaning sifatsizligi to‘g‘risida 1091 ishonch telefoni orqali qilgan murojaati Qarshi shahar isteʼmolchilar huquqlarini himoya qilish jamiyati tomonidan o‘rganildi.
Murojaatda aytilishicha, fuqaro “Qashqadaryo avtotexxizmat” MCHJ avtosaloni bilan 2022-yilning 23-mayida tuzilgan shartnomaga muvofiq 128 million 645 ming so‘m to‘lab, Cobalt xarid qilgan. Shartnoma shartlariga ko‘ra, mashina 2022-yilning 31-oktabriga qadar isteʼmolchiga yetkazib berilishi belgilangan bo‘lsa-da, 17-dekabr kuni olib kelingan. Qolaversa, avtomashinaning tashqi bo‘yoq qismida jiddiy nuqsonlari borligi maʼlum bo‘lgan.
O‘rganish davomida avtomashinaga bo‘yash vositasi belgilangan meʼyordan kam sepilgani aniqlangan va bu haqda avtosalon mutasaddilari ishtirokida dalolatnoma rasmiylashtirilgan.
Avtomashinadagi nuqsonni servis xizmati asosida bartaraf etishning imkoni yo‘qligi hamda isteʼmolchining talabiga ko‘ra, amaldagi isteʼmolchilar huquqlarini himoya qilishga oid qonunchilik asosida nuqsonli Cobalt avtomashinasi ishlab chiqaruvchi tomonidan yangisiga almashtirib berilgan.
Izoh (0)