АҚШнинг Миссисипи штати қонун чиқарувчи органи Ўзбекистон билан ҳамкорликни қўллаб-қувватловчи махсус резолюцияни қабул қилди.
Хабарга кўра, Ўзбекистон элчиси Жавлон Ваҳобов АҚШнинг Миссисипи штати Сенати ва Вакиллар палатасининг навбатдан ташқари сессияларида иштирок этди. Унда қонунчилар бир овоздан Штат миллий гвардияси ва Ўзбекистон ўртасидаги ҳамкорликнинг 10 йиллиги, шунингдек, республика билан ҳамкорликни кенгайтиришни қўллаб-қувватлашга бағишланган резолюциянинг қабул қилинишини ёқлаб овоз берди.
Миссисипи Қонунчилик палаталарининг алоҳида сессияларида генерал Женсон Бойлес бошчилигидаги Штат миллий гвардияси вакиллари, Миссисипи губернаторининг ўринбосари ва Сенат президенти Делберт Хосеманн, Вакиллар палатаси спикери Филип Гунн, Қуйи палатанинг Мудофаа қўмитаси раиси ва аъзолари, шунингдек, штатнинг қонун чиқарувчилари ҳамда оммавий ахборот воситалари вакиллари иштирок этди.
Сессияларда Миссисипи қонун чиқарувчи органи вакиллари — депутат ва сенаторларга Ўзбекистон ҳамда Миссисипи Миллий гвардияси биргаликда 10 йил давомида ўтказилган кўплаб тадбирлар мазмун-моҳияти алоҳида таъкидланган резолюцияни ўқиб берди. Бундан ташқари, 2019 йилдан бошлаб тўрт йил кетма-кет Ўзбекистон вакиллари Миссисипи штатида ҳар йили ўтказиладиган “Южний удар” машғулотларида қатнашиб, сўнгги уч йил ичида “Best Warrior” танловида ҳам ғолиб бўлди.
Шунингдек, 2022 йилда Миссисипи Миллий гвардияси айнан Ўзбекистон билан самарали ҳамкорлик қилгани учун “Йил ҳамкорлиги” номинациясида иккинчи ўрин билан тақдирлангани ҳам қайд этилган.
Резолюцияда Ўзбекистон ва Миссисипи Миллий гвардияси ўртасидаги ҳамкорлик муҳимлиги ҳам ўз ифодасини топгани ҳолда икки томонлама алоқаларнинг янада кенгайишига умид билдирилган. Миссисипи штати қонун чиқарувчи палаталари йиғилишлари якунларига кўра, депутатлар ва сенаторлар резолюцияни ёқлаб овоз беришди. Қонунчилик ҳужжатининг асл нусхаси Ўзбекистон элчиси Жавлон Ваҳобовга топширилди.
Изоҳ (0)