Ukraina prezidenti Vladimir Zelenskiy Rossiya prezidenti Vladimir Putinning Federal Majlisga murojaatiga va yadroviy tahdidlariga munosabar bildirdi. Bu haqda UNIAN xabar berdi.
Zelenskiy Kiyevda Italiya bosh vaziri Jorj Meloni bilan o‘tkazilgan qo‘shma brifingda Putinning yadro qurolini sinovdan o‘tkazishi ehtimolini izohlagan.
“Xo‘sh, nima deyish mumkin? Men uning murojaatini ko‘rmadim, chunki aynan o‘sha paytda Xerson viloyatida hujumlar bo‘layotgandi. Oqibatda 21 kishi jarohatlandi, 6 kishi halok bo‘ldi”, — dedi Zelenskiy va halok bo‘lganlarning oila a’zolari va yaqinlariga hamdardlik bildirdi.
Shuningdek, Ukraina rahbari aynan shu sababli mamlakatga havo hujumidan mudofaa tizimi zarurligini qayd etdi.
“Terrorchi davlatdan himoyalanishning boshqa yo‘li hozircha yo‘q. Lekin hammasi oldinda va biz bunga tayyorlanyapmiz. Yadro quroli sinovlariga tayyorgarlik ko‘rishyaptimi yoki yo‘qligiga kelsak, Putin avvaliga qandaydir qo‘rqitish haqida gapirdi, keyin uni AQSHdan kelgan ba’zi xabarlar va shunga o‘xshash narsalar bilan bog‘ladi. Bunday holat har doim kuzatiladi. Rostini aytsam, endi hech kim ularga e’tibor bermayapti”, — dedi u.
Zelenskiy Rossiya allaqachon terrorchi sifatida muloqot qila boshlaganini qayd etdi.
“Yagona farq shundaki, terroristlar niqob kiyadi, bular hatto yuzlarini yashirmaydi. Shunga o‘xshash narsa. Bu odamning nutqi ikki soatcha davom etdi, lekin ular Xersonga hujum qilib, infratuzilmani vayron qildi, odamlarni o‘ldirdi. Mana ular nimani gapirib, qanday yo‘l tutadi”, — ta’kidladi u.
Putinning yadroviy tahdidi
Bugun Rossiya prezidenti Vladimir Putin Federal Majlisdagi nutqida Rossiya AQSH bilan strategik qurollarni qisqartirish bo‘yicha shartnomada ishtirok etishni vaqtinchalik to‘xtatganini ma’lum qildi. U Rossiya Mudofaa vazirligi va Rosatom Rossiya yadro qurolini sinovdan o‘tkazishga tayyorligini ta’minlashi kerakligini aytdi.
Strategik hujum qurollari to‘g‘risidagi shartnoma AQSH va Rossiya o‘rtasidagi yadroviy qurollarni cheklovchi kelishuvdir. Shartnoma shartlari ogohlantirish holatidagi yadro kallaklari sonini cheklaydi. Bu kelishuv mamlakatlar o‘rtasida yadroviy salohiyatni kamaytirish va qurolsizlanish bo‘yicha imzolangan qator hujjatlardan biridir.
Putin nutqi paytida Rossiya kuchlari Xersonni o‘qqa tutdi. Dushman aholi turar joylari, muhim infratuzilma obyektlari, bolalar bog‘chasi, kasalxona, shaxsiy garajlar va avtomashinalarga hujum qildi. Bir nechta uylar jiddiy zarar ko‘rdi. Bozor va jamoat transporti bekati ham o‘qqa tutildi. Hujum oqibatida olti kishi halok bo‘ldi.
Izoh (0)