“Daryo” nashri 21-fevralda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya va AQSH munosabatlari qayta tiklanadimi?
AQSH Davlat departamenti mamlakat rahbari Jo Baydenning Rossiya prezidenti Vladimir Putin bilan uchrashish shartini ma’lum qildi. Bu haqda BBC xabar berdi.
“Albatta, buning uchun Ukrainaga qarshi tajovuz tugashini ko‘rishimiz kerak. Ukrainada urush davom etayotganda bu darajada diplomatik muzokaralar olib borish juda qiyin”, — deydi Departament matbuot kotibi Andrea Kaplan.
Kaplan prezident Bayden har qanday yetakchi bilan uchrashishga tayyorligini, ammo bu AQSH manfaatlariga mos kelishi kerakligini eslatdi. “Bu to‘liq diplomatik suhbat bo‘lishi kerak”, — dedi Kaplan va Baydenning hozirda Putin bilan uchrashish rejasi yo‘qligini qo‘shimcha qildi.
Shuningdek, rasmiy AQSH nafaqat Putin bilan, balki Rossiyaning boshqa vakillari bilan ham uchrashuv o‘tkazishga hozircha tayyor emasligini ta’kidladi.
“Rossiya Ukrainada urush olib borayotgan paytda buning iloji yo‘q. Bunday agressiyaga, Rossiya diplomatiyaga hali tayyor emasligiga guvoh ekanmiz, uchrashuvdan ma’no yo‘q”, — dedi Kaplan.
Baxmut uchun mudofaa chizig‘iga odamlar to‘lqinini tashlash uslubi...
Eslatib o‘tamiz, avvalroq NATO bosh kotibi Yens Stoltenberg Putin tinchlikni xohlamasligi va u allaqachon Baxmut hududida yangi hujum amaliyotlarini boshlaganini aytdi.
“Bu yirik bahorgi hujummi yoki shunchaki uning muqaddimasimi, aytish qiyin. Lekin ular tobora ko‘proq qo‘shin va ko‘proq qurol-yarog‘larni tortib kelmoqda”, — degan NATO bosh kotibi.
Stoltenbergning qo‘shimcha qilishicha, Rossiya harbiy xizmatchilar sonini oshirish bilan qoniqarsiz jihozlar va yomon logistika ta’minotini xaspo‘shlashga harakat qilmoqda.
Alyans vakili buni “mudofaa chizig‘iga odamlar to‘lqinini tashlash” deb atadi.
Bugun esa Ukraina razvedkasi Rossiya talabalarni ommaviy safarbar qilishga tayyorlanayotgani haqida xabar berib, dalil sifatida Tomsk davlat pedagogika universiteti rahbariyatiga tegishli 9-fevraldagi buyruqning nusxasini e’lon qildi. Voqealar rivojini kuzatamiz.
Afg‘oniston ortiq beqaror vaziyat tufayli iqtisodiy imkoniyatlaridan cheklanishni xohlamaydi, bu yo‘lda uning qo‘llab-quvvatlovchisi kim bo‘ladi?
Afg‘onistonda “Tolibon” hukumati sobiq xorijiy harbiy bazalarning bir qismini maxsus iqtisodiy zonalarga aylantirishni rejalashtirmoqda. Bu haqda BBC va Reuters xabar berdi.
Afg‘onistondagi iqtisodiy vaziyat “Tolibon” 2021-yilning avgustida mamlakatda hokimiyatni qo‘lga olganidan keyin yomonlasha boshladi. Buning asosiy sabablaridan biri Afg‘onistonga 2000-yillarning boshidan beri yordam berib kelayotgan asosiy donor davlatlarning “Tolibon” bilan hamkorlik qilishdan bosh tortishi bo‘ldi. Shuningdek, xalqaro tashkilotlarning aksariyati ham mamlakatdagi faoliyatini to‘xtatdi.
Ayni paytda Afg‘oniston bosh vazirining iqtisodiy masalalar bo‘yicha o‘rinbosari Mulla Abdul G‘ani Barodar xorijiy kuchlarning ayrim harbiy bazalarini maxsus iqtisodiy zonalarga aylantirish uchun ularni bosqichma-bosqich nazoratga olish kerakligi haqidagi qarorni ma’lum qildi.
Loyiha poytaxt Kobul va shimoliy Balx viloyatidagi bazalardan boshlanadi.
Mutaxassislarning fikricha, Afg‘onistonda 1 trillion dollardan ortiq tabiiy resurslar, jumladan, tabiiy gaz, mis va noyob yer jinslari mavjud. Biroq bu zaxiralarning aksariyatidan mamlakatda o‘nlab yillar davom etgan beqarorlik tufayli foydalanilmayapti.
Avvalroq “Tolibon” Afg‘oniston shimolida neft quduqlarini burg‘ulash bo‘yicha Xitoy firmasi bilan shartnoma imzolashni rejalashtirayotganini ma’lum qilgandi. O‘z-o‘zidan 25 yillik shartnoma Xitoyning mintaqadagi iqtisodiy ishtirokini nazarda tutadi.
Pekin boshqa davlatlar singari “Tolibon” hukumatini rasman tan olmagan bo‘lsa-da, biroq Xitoyning “Bir kamar, bir yo‘l” tashabbusi uchun Afg‘onistonda uning asosiy manfaatlari yotadi.
2022-yil yakuniga ko‘ra, o‘zbekistonliklarning salkam 1,5 mln nafari Rossiyaga ishlashga ketdi, sabablar bilan tanishamiz
Rossiyaga 2022-yilda ishlash uchun kelgan xorijiy fuqarolar soni 3,47 million kishini tashkil etdi. Mazkur ko‘rsatkich o‘tgan yilga nisbatan 33 foizga ko‘pdir. Bu haqda Finexpertiza audit va konsalting tarmog‘i tahliliy xizmatiga tayanib, “TASS” xabar bermoqda.
O‘zbekiston fuqarolari Rossiyaga kelgan barcha mehnat muhojirlari orasida yetakchi bo‘ldi — 1,45 mln o‘zbekistonlik 2022-yilda Rossiyaga borgan. Bu ko‘rsatkich bir yilda ishlash uchun kelgan umumiy muhojirlar soniga nisbatan 41,9 foizni tashkil qiladi.
Tojikiston fuqarolari (28,4 foiz yoki 986,7 ming kishi) ikkinchi bo‘lgan bo‘lsa, uchinchi o‘rinni Qirg‘izistondan kelgan muhojirlar (16,2 foiz yoki 562,6 ming kishi) egalladi.
2022-yilda koronavirusdan oldingi davr bilan solishtirganda, Rossiyaga kelgan xorijliklarning umumiy soni 2,5 baravar kam bo‘lgan, mehnat muhojirlari soni esa sezilarli darajada kamroq — atigi 15,3 foizga (yoki 626 ming kishi) qisqargan.
Mutaxassislar kadrlar yetishmasligi fonida kuryerlar, haydovchilar, quruvchilar va yuk ko‘taruvchilarning ish haqi rublning mustahkamlanishi fonida jozibadorlikka ega bo‘lganini ta’kidladi. Natijada muhojirlar uchun xorijiy valyutadagi daromadlar sezilarli darajada oshgan.
Izoh (0)