AQSH prezidenti Jo Bayden Polshaga tashrifi doirasida Varshavada nutq so‘zladi. Oq uy rahbari rossiyaliklarga murojaat qilib, AQSH va Yevropa davlatlari Rossiyani yo‘q qilishni yoki nazoratga olishni istamasligini aytdi.
“G‘arb, Putin da’vo qilganidek, Rossiyaga hujum qilmoqchi emas. Bu urushga hech qachon zarurat bo‘lmagan edi, bu fojia. Bu urushni (Rossiya prezidenti Vladimir) Putin tanladi. Urushning har bir yangi kuni uning tanlovi”, — dedi Bayden.
AQSH prezidenti Rossiya Ukrainada vahshiyliklar sodir etayotganini aytib, “avtokratlarning ishtahasini qondirib bo‘lmaydi, ularga qarshilik ko‘rsatish kerak”, deya qo‘shimcha qildi. U Ukraina hududida harbiy jinoyat sodir etganlarning barchasini javobgarlikka tortishga va’da berdi. “Rossiya hech qachon Ukrainani mag‘lub etolmaydi. Hech qachon”, — dedi Bayden.
AQSH prezidenti agar Rossiya NATO davlatlaridan biriga hujum qilsa, bu butun alyansga hujum sifatida baholanishi haqida ogohlantirdi. “NATOning bir davlatiga qilingan hujum butun NATOga qilingan hujum bo‘ladi. Putin buni bilishi kerak. Bu muqaddas”, — dedi Amerika rahbari.
Baydenning taʼkidlashicha, o‘tgan yil davomida Kreml G‘arb koalitsiyasi o‘rtasidagi kelishuvni buzishga ulgurmagan, Ukrainaga harbiy va gumanitar yordamlar kelishi davom etmoqda.
AQSH prezidenti o‘z nutqi davomida Rossiyaning Ukrainaga bostirib kirishi boshlanganidan bir yil o‘tib Kiyev hamon mustahkam ekanini, Putin Ukrainani past baholaganini aytdi.
“Biz (Ukrainaning) suvereniteti uchun turishimiz kerak edi va shunday qildik ham. Ha, biz demokratiyani himoya qilishimiz kerak edi va himoya qildik”, — dedi Bayden AQSH va ittifoqchilarning Ukrainani qo‘llab-quvvatlashi haqida gapirar ekan.
“Putin demokratiyani zaif deb o‘yladi, lekin buning o‘rniga erkin mamlakatlarning temir irodasiga duch keldi”, — dedi Bayden. Uning so‘zlariga ko‘ra, AQSH va uning hamkorlari shu hafta Rossiyaga qarshi yangi sanksiyalar e’lon qiladi.
AQSH rahbari Putin energiyadan qurol sifatida foydalanishga uringanini, lekin G‘arb birlashib, Rossiya energiya resurslariga qaramlikni kamaytirganini ta’kidladi.
Eslatib o‘tamiz, Varshavadagi nutqidan avval Bayden e’lon qilinmagan tashrif bilan Kiyevga kelgandi. U yerda Zelenskiy bilan uchrashib, Ukrainaga qo‘shimcha yordam va’da qildi.
Izoh (0)