AOKAda o‘tkazilgan brifingda “Toshkent metropoliteni” DUK harakat xizmati rahbari Sulton Qodirov metropoliten infratuzilmasi jozibadorligini oshirish bo‘yicha vazifalar ijrosi bo‘yicha ma’lumot berdi.
Qayd etilishicha, prezident qarori asosida metropoliten bekatlarida savdo shoxobchalari faoliyati tiklanadi. Hozirda “Novza” metro bekatining piyodalar o‘tish yo‘lagida tajriba-sinov tariqasida savdo shoxobchalarini qurish ishlari amalga oshirilmoqda.
Shuningdek, Toshkent shahar Yashnobod tumanidan o‘tuvchi yerusti metro yo‘nalishi estakadasi ostidagi (umumiy yer maydoni 2,9 gektar) hududda 1200 o‘rinli beshta avtoturargoh hamda Sergeli tumanidan o‘tuvchi yerusti metro yo‘nalishi (umumiy yer maydoni 3,37 gektar) hududida 1500 o‘rinli yettita avtoturargoh tashkil etish rejalashtirilgan.
Rejalashtirilgan ishlarning amalga oshirilishi natijasida umumiy hisobda 1700 ta yangi ish o‘rinlari yaratiladi.
Ma’lumot uchun, yuqoridagi prezident qarorlariga asosan metropoliten yo‘lovchilariga sifatli xizmat ko‘rsatish uchun 2023-yil davomida metro vagonlarining parkini yangilash maqsadida metro yo‘nalishlariga beshinchi vagon sifatida 10 ta harakat tarkiblariga qo‘shimcha vagon qo‘shiladi, shuningdek, 14 ta to‘rt vagonli zamonaviy turdagi yangi harakat tarkiblari foydalanishga topshiriladi.
“Natijada metro poyezdlari harakatlanish jadvalida ko‘rsatilgan intervallarni qisqartirishga erishiladi”, — deyiladi xabarda.
Izoh (0)