Samarqand viloyati Urgut tumanida maktab o‘quvchisi olib qochgan mashina botqoqlikdan topildi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, Urgut tumani “Quyikamongaron” mahallasida yashovchi fuqaro tuman ichki ishlar bo‘limiga murojaat qilib, 18-fevral kuni soat taxminan 21:00 larda uyi oldiga qo‘ygan Lacetti yo‘qolganini aytgan. Hodisa sodir bo‘lgan joyga Yo‘l-patrul xizmati va tergov guruhi yetib kelgan. Hodisa sodir bo‘lgan joy ko‘zdan kechirilganda, mashinaning eshik ochqichi siniq bo‘laklari, yelim truba va energetik ichimlik idishi aniqlanib, tegishli tartibda hujjatlashtirib olingan.
Mazkur holat yuzasidan tuman ichki ishlar bo‘limi huzuridagi tergov bo‘limi tomonidan nomaʼlum shaxsga nisbatan Jinoyat kodeksining 267-moddasi 1-qismi bilan jinoyat ishi qo‘zg‘atilgan. Olib borilgan surishtiruv ishlari davomida holat voyaga yetmagan bola tomonidan amalga oshirilgani aniqlangan.
Maktabda 8-sinfda o‘quvchi A.G. Lacetti’ning eshigini yelim truba orqali ochib, uning kaliti o‘zida turganidan foydalangan. Mashinani “Chorchinor” mahallasi tomonga boshqarib ketayotganda yo‘lning loy qismida g‘ildiraklari botib qolgan. Shu vaqt u mashinani botqoqlikdan chiqarishga urinayotgan paytda qo‘lga olingan. Holat yuzasidan jinoyat ishi qo‘zg‘atilib, tergov harakatlari olib borilmoqda.
“Tumandagi maktabda 8-sinfda o‘qiyman. Kecha soat 02:00 larda uydan ruxsat so‘ramay chiqdim. Bir mashinaga ko‘zim tushdi. Yonida katta truba bor ekan. Kaliti ichidaligi uchun eshikni truba orqali ochib, haydab ketdim. Botqoqlikka botib qoldim. Egasiga qaytarib olib kelmoqchi edim. Ichki ishlar xodimlari kelib, meni olib ketib qolishdi. Ishimdan qattiq pushaymonman”, deydi mashinani olib qochgan bola.
Izoh (0)