Samarqand viloyati Nurobod tumanida YPX xodimi haydovchini quvib ketayotgani aks etgan video tarqaldi. Viloyat Ichki ishlar boshqarmasi axborot xizmati mazkur videoga izoh berdi.
Xabarga ko‘ra, 18-fevral kuni soat 15:40 larda tuman hududidan o‘tuvchi A-378 avtomobil yo‘lining 23-kilometrida YPX xodimlari tomonidan Spark rusumli avtomobil haydovchisi to‘xtatilib, tekshirish maqsadida me’yoriy hujjatlarini taqdim etishi so‘ralgan. Shu payt haydovchi hujjatlari yo‘qligini ma’lum qilgan. Qoidabuzarlik holati bo‘yicha ma’muriy bayonnoma rasmiylashtirish vaqtida atrofda bo‘lgan uch nafar fuqaro xodimlarning faoliyatiga to‘sqinlik qilib, transport vositasi vaqtincha saqlash uchun jarima maydoniga qo‘yilishiga ham qarshilik ko‘rsatgan.
Haydovchiga nisbatan Yo‘l harakati qoidalarining 7-bandini buzganligi bo‘yicha Ma’muriy javobgarlik to‘g‘risidagi kodeksning 135-moddasi tartibida bayonnoma tuzilib, Spark rusumli avtomobil ushbu kodeksning 291-moddasi tartibida vaqtincha saqlash uchun jarima maydoniga qo‘yilgan.
Qayd etilishicha, YPX xodimlarining qonuniy xizmat faoliyatiga xalaqit bergan fuqarolar bo‘yicha tegishli hujjatlar to‘planmoqda.
Izoh (0)