Iqtisodiy tadqiqotlar va islohotlar markazi direktori Obid Hakimov O‘zbekiston va Misr o‘rtasida foydalanilmagan ulkan salohiyat mavjudligini aytdi. Bu haqda markazning jamoatchilik bilan aloqalar sho‘basi xabar berdi.
Qayd etilishicha, Obid Hakimov 18-fevral kuni Qohirada O‘zbekiston va Misr o‘rtasidagi iqtisodiy hamkorlikni yanada rivojlantirishning istiqbolli yo‘nalishlariga bag‘ishlangan davra suhbatida so‘nggi yillarda iqtisodiy sohada O‘zbekiston—Misr munosabatlari faol rivojlanish bosqichiga o‘tganini taʼkidladi. 2017-yildan buyon o‘zaro savdo va sarmoyaviy hamkorlik faollashib, ushbu yo‘nalishga ustuvor ahamiyat berilayotganini, Misr prezidenti as-Sisining 2018-yil 4-sentabrda O‘zbekistonga rasmiy tashrifi yakunlari bo‘yicha qiymati 483 million dollarlik savdo va sarmoyaviy kelishuvlarga erishilganini qayd etdi.
Markaz hisob-kitoblariga ko‘ra, O‘zbekiston va Misr o‘rtasidagi tovar ayirboshlash hajmi so‘nggi besh yilda uch barobardan ortiq, 2017-yilda qariyb 10 million dollardan 2022-yilda 30,5 million dollargacha oshdi. O‘zbekistonning Misrga eksporti 16 barobarga oshgan.
O‘zbekistonning Misrga eksporti tarkibiga to‘qimachilik mahsulotlari, transport uskunalari va xizmatlari, shu jumladan havo transporti xizmatlari kiradi. O‘zbekistonning 2022-yilda Misrdan amalga oshirilgan import tarkibiga oziq-ovqat mahsulotlari, kimyo mahsulotlari, mashina va transport uskunalari va xizmatlar o‘rin olgan.
Markaz direktorining so‘zlariga ko‘ra, investitsion sohadagi hamkorlik ham faol rivojlanmoqda. Xususan, O‘zbekistonda misrlik ishbilarmonlarning kapitali ishtirokida 29 ta qo‘shma korxona faoliyat ko‘rsatmoqda. Misrning “Solifar” kompaniyasi bilan hamkorlikda Toshkent viloyatidagi “Bo‘stonliq-farm” EIZda farmatsevtika sohasida (qiymati 20 million dollar) ishlab chiqarish loyihasini amalga oshirish bo‘yicha ishlar olib borilmoqda. Qashqadaryo viloyatida gepatit C preparatlarini ishlab chiqarishni yo‘lga qo‘yish bo‘yicha (1,4 million dollar) Misrning One World Pharma kompaniyasi bilan ishlar olib borilmoqda. Kapo Agri kompaniyasi bilan Namangan viloyatida baliqchilik sohasidagi loyiha bo‘yicha muzokaralar o‘tkazildi.
Shu bilan birga, O‘zbekiston va Misr o‘rtasidagi o‘zaro savdo va investitsion ko‘rsatkichlari hajmi to‘g‘risidagi maʼlumotlar tahlili natijasida ushbu sohada hali foydalanilmagan ulkan salohiyat mavjudgi alohida qayd etib o‘tildi.
Ma’lumot uchun, Shavkat Mirziyoyev Misr prezidenti Abdulfattoh As-Sisining taklifiga binoan 20—21-fevral kunlari rasmiy tashrif bilan ushbu mamlakatda bo‘ladi. Rasmiy tashrif arafasida O‘zbekiston—Misr biznes forumi bo‘lib o‘tdi. Biznes-forum yakunlari bo‘yicha kimyo, energetika, tog‘-kon sanoati, to‘qimachilik, charm-poyabzal va oziq-ovqat mahsulotlari mahsulotlari ishlab chiqarish, sanoat zonalarini rivojlantirish, infratuzilmani rivojlantirish, qurilish, farmatsevtika kabi sohalarda qo‘shma loyihalarni amalga oshirish yuzasidan kelishuvlarga erishildi.
Izoh (0)