Ukraina Milliy xavfsizlik va mudofaa kengashi kotibi Aleksey Danilov Ukraina fuqaroligidan mahrum etilgan, sobiq deputat Viktor Medvedchuk Rossiya prezidenti Vladimir Putinga urush bo‘yicha “B reja”ni taklif qilganini aytdi. Bu haqda Danilov BBC’ga bergan intervyusida ma’lum qildi.
Danilovning so‘zlariga ko‘ra, Rossiya Ukrainani to‘liq qo‘lga kirita olmasligini allaqachon anglab yetgan.
“Rossiyada hozirda koreys variantni yaratishni rejalashtirmoqda. Kremldagilar Ukrainani to‘liq egallab ololmasligini anglab yetgan va endi ikkinchi Ukraina deb atalgan B rejasini tuzadi”, — dedi rasmiy.
U mazkur reja sobiq Oliy Rada deputati va “Muxolifat platformasi — hayot uchun” rossiyaparast partiyasi siyosiy kengashi sobiq rahbari Viktor Medvedchuk tomonidan taqdim etilganini ta’kidladi.
“Aqldan ozgan mazkur rejani Medvedchuk ilgari surgan. U o‘zini Ukrainada professional odam deb hisoblaydi, lekin unday emas, u shunchaki xoin”, — ta’kidladi Ukraina Milliy xavfsizlik va mudofaa kengashi kotibi.
Danilov Rossiyaning maqsadi yaqin kelajakda Donetsk va Lugansk viloyatlarini Qrimga quruqlik yo‘lagi bilan birga to‘liq bosib olish, keyin esa Ukrainani bo‘lib tashlash g‘oyasini amalga oshirish ekanini aytdi.
Ukraina siyosatchisi va Vladimir Putinning “qadrdoni”, Ukrainaga xiyonatda ayblanayotgan Viktor Medvedchuk Rossiya bosqinidan ko‘p o‘tmay hibsga olingan. Sentyabr oyida u va yana 55 nafar rus askari ukrainalik harbiy asirlarga almashtirilgan. Uzoq vaqt davomida Medvedchukning Rossiyadagi taqdiri haqida hech narsa ma’lum emas edi, lekin 2023-yilning yanvar oyida u Rossiyaning "Izvestiya" gazetasida siyosiy maqola e’lon qildi, unda u G‘arbni va Ukraina hukumatini Rossiya bilan urush boshlaganlikda aybladi.
Izoh (0)