Ukraina prezidenti Vladimir Zelenskiy Rossiya rahbari Vladimir Putinning Ukrainaga bosqini so‘nggi bekat bo‘lmasligini aytdi. Bu haqda Reuters xabar berdi.
Zelenskiy 17-fevral kuni Myunxen xavfsizlik konferensiyasida G‘arb Kiyev uchun tanklar yetkazib berish bo‘yicha muzokaralar olib borayotgan bir paytda, Rossiya Ukrainaning g‘arbida sobiq Sovet respublikasi Moldovani “bo‘g‘ish” yo‘llarini o‘ylayotganini aytdi.
“Ukraina uning so‘nggi bekati bo‘lmasligi aniq. U o‘z harakatini butun yo‘lda davom ettiradi, shu jumladan, qachonlardir Sovet blokining bir qismi bo‘lgan boshqa barcha davlatlarni ham nishonga oladi”, — dedi Zelenskiy.
Shuningdek, siyosatchi Rossiya bosqinini yengish uchun ittifoqchilarni qurol jo‘natishni tezlashtirishga chaqirdi. Jahon yetakchilarini jim turish va qurol yetkazishdagi kechikishlar ularning xavfsizligiga ham tahdid solayotganidan ogohlantirdi.
Avvalroq Ukraina prezidenti Bryusselda bo‘lib o‘tgan Yevropa Ittifoqi sammitida Rossiya Moldovani bosib olishni rejalashtirayotgani aytgandi. Zelenskiy razvedka qo‘lga kiritgan Rossiyaning bosib olish rejasi haqida Moldova prezidenti Mayya Sanduni ogohlantirganini ta'kidlagan.
Shundan so‘ng Mayya Sandu Moldova prezidenti Rossiyaning mamlakatda davlat to‘ntarishini amalga oshirish rejalari haqida gapirgan. U Rossiya Belarus, Serbiya va Chernogoriya fuqarolarini jalb qilgan holda Moldovadagi hukumat binolariga hujum qilishni va hokimiyatni o‘zgartirishni rejalashtirayotganini aytgan.
Bungacha Moldova razvedkasi rahbari Rossiya 2023-yil boshida mamlakatga qarshi urush boshlashni rejalashtirgani, ammo ssenariyni amalga oshirish Ukrainadagi vaziyatning rivojlanishiga bog‘liqligini ma’lum qilgandi. Rossiya tashqi ishlar vaziri Sergey Lavrov G‘arb davlatlari Moldovani “navbatdagi Ukraina” sifatida ko‘rayotganini aytgandi.
Izoh (0)