“Daryo” nashri 17-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Rossiyaning bahorga prognoz qilingan hujumi boshlandimi?
Rossiya armiyasining Ukrainaga avval prognoz qilingan bahorgi hujumi boshlandi, deb ma’lum qildi Vladimir Zelenskiy BBC bilan suhbatda.
“Rossiya hujumlari allaqachon bir necha yo‘nalishda amalga oshirilmoqda”, — dedi Ukraina prezidenti.
Uning taʼkidlashicha, Ukraina Qurolli kuchlari o‘zlari qarshi hujumga o‘tguncha Rossiya hujumlarini qaytarib turadi. Lekin buning uchun Ukrainaga ko‘proq G‘arb qurollari kerak. “Qurol — bu Rossiya tushunadigan yagona til”, — dedi Zelenskiy.
Bundan tashqari, u Ukraina Vladimir Putin bilan hech qanday hududiy yon berish yoki murosaga bormasligini aytdi.
“Bugun bizning omon qolishimiz, birligimiz yagona maqsad. Biz Yevropa tomon ketyapmiz, Ukraina shu yo‘lni tanladi. Ukraina xavfsizlik kafolatlarini xohlaydi. Shunday ekan, har qanday hududiy murosa davlatimizni zaiflashtiradi. Gap ’murosa’ so‘zida emas. Savol kim bilan murosa qilishda. Putin bilanmi? Yo‘q! Nega? Chunki unga ishonch yo‘q”, — deydi Zelenskiy.
Ukrainalik uchuvchilar g‘arb qiruvchi samolyotlaridan foydalanishga o‘rgatiladi
Ukraina hozircha hech bir davlatdan jangovar samolyotlar yetkazib berish bo‘yicha va’da olmadi. Bu haqda mamlakat tashqi ishlar vaziri Dmitriy Kuleba Germaniyaning Funke media guruhi va Fransiyaning Ouest-France gazetasiga bergan intervyusida ma’lum qildi.
“Shu paytgacha hech bir davlat qiruvchi samolyotlar yetkazib berish majburiyatini olgani yo‘q. Ammo Buyuk Britaniya singari ayrim hukumatlar ukrainalik uchuvchilarni G‘arb qiruvchilariga o‘rgatishi haqida eʼlon qilgan”, — dedi Kuleba.
Uning so‘zlariga ko‘ra, qiruvchilar dushman raketalarini urib tushirish orqali Ukraina havo mudofaasini qo‘llab-quvvatlashi mumkin edi. Bundan tashqari, ular “qarshi hujum uchun” muhim ahamiyatga ega. “Bizni birinchi navbatda, AQSH, Buyuk Britaniya, Fransiya va Germaniya qiruvchilari qiziqtirmoqda”, — dedi vazir va bu davlatlar “eng yuqori ishlab chiqarish quvvatlari va eng yirik samolyot parklariga” ega ekanini taʼkidladi.
Rossiya va Ukraina nima uchun urushni diplomatik yo’l bilan hal qila olmayapti?
Dmitriy Kuleba ayni damda Ukrainadagi urushni diplomatik yo‘l bilan tugatishning iloji yo‘q, degan fikrni ham bildirdi.
“Menga diplomatik tashabbuslar orqali tinchlikka erishmoqchi bo‘lganlar yoqadi, chunki o‘zim diplomatman. Lekin bunday tashabbusni qanday qilib amalga oshirish mumkin? Tinchlik narxi Rossiyaning bosib olingan hududlarda qolishiga teng bo‘ladimi?” — so‘radi Ukraina tashqi ishlar vaziri ritorik tarzda.
“Rossiya bilan har qanday muzokaralar avvalida quyidagicha bo‘lishi kerak: Ukrainaning hududiy yaxlitligi to‘liq tiklanishi shart. Buni muzokara qilib bo‘lmaydi”, — dedi u.
Kulebaning so‘zlariga ko‘ra, tinchlik va diplomatiya tarafdorlarining ko‘pchiligi “aslida faqatgina Ukraina Rossiyadan mag‘lub bo‘lishini xohlaydi”.
Tamagirlik yo'li bilan pora olganlikda gumonlanayotgan sudyaga nisbatan jinoyat ishi qo'zg'atildi
Toshkent shahar Yashnobod tumani sudi sudyasiga nisbatan jinoyat ishi qo‘zg‘atiladi. Bu haqda Sudyalar oliy kengashi xabar qildi.
Qayd etilishicha, 17-fevral kuni kengashning navbatdan tashqari yig‘ilishi bo‘lib o‘tgan. Unda bosh prokurorning Toshkent shahar jinoyat ishlari bo‘yicha Yashnobod tuman sudi sudyasi I.B.ni Jinoyat kodeksining 210-modda 2-qismi “v” bandi (tamagirlik yo‘li bilan pora olish) bilan jinoiy javobgarlikka tortishga oid taqdimnomasi muhokama qilingan.
Kengash xulosasi bilan I.B.ni jinoiy javobgarlikka tortishga rozilik berilgan va uning sudyalik vakolati to‘xtatilgan.
“Tergov siri va aybsizlik prezumpsiyasi talablaridan kelib chiqib, boshqa tafsilotlar oshkor qilinmaydi”, — deyiladi xabarda.
Ma’lumot uchun, yuqoridagi jinoyatni sodir etganlikda aybdor deb topilgan shaxs besh yildan o‘n yilgacha ozodlikdan mahrum qilish bilan jazolanadi.
Izoh (0)