Украина президенти Владимир Зеленский Россия раҳбари Владимир Путиннинг Украинага босқини сўнгги бекат бўлмаслигини айтди. Бу ҳақда Reuters хабар берди.
Зеленский 17 февраль куни Мюнхен хавфсизлик конференциясида Ғарб Киев учун танклар етказиб бериш бўйича музокаралар олиб бораётган бир пайтда, Россия Украинанинг ғарбида собиқ Совет республикаси Молдовани “бўғиш” йўлларини ўйлаётганини айтди.
“Украина унинг сўнгги бекати бўлмаслиги аниқ. У ўз ҳаракатини бутун йўлда давом эттиради, шу жумладан, қачонлардир Совет блокининг бир қисми бўлган бошқа барча давлатларни ҳам нишонга олади”, — деди Зеленский.
Шунингдек, сиёсатчи Россия босқинини енгиш учун иттифоқчиларни қурол жўнатишни тезлаштиришга чақирди. Жаҳон етакчиларини жим туриш ва қурол етказишдаги кечикишлар уларнинг хавфсизлигига ҳам таҳдид солаётганидан огоҳлантирди.
Аввалроқ Украина президенти Брюсселда бўлиб ўтган Европа Иттифоқи саммитида Россия Молдовани босиб олишни режалаштираётгани айтганди. Зеленский разведка қўлга киритган Россиянинг босиб олиш режаси ҳақида Молдова президенти Майя Сандуни огоҳлантирганини таъкидлаган.
Шундан сўнг Майя Санду Молдова президенти Россиянинг мамлакатда давлат тўнтаришини амалга ошириш режалари ҳақида гапирган. У Россия Беларусь, Сербия ва Черногория фуқароларини жалб қилган ҳолда Молдовадаги ҳукумат биноларига ҳужум қилишни ва ҳокимиятни ўзгартиришни режалаштираётганини айтган.
Бунгача Молдова разведкаси раҳбари Россия 2023 йил бошида мамлакатга қарши уруш бошлашни режалаштиргани, аммо сценарийни амалга ошириш Украинадаги вазиятнинг ривожланишига боғлиқлигини маълум қилганди. Россия ташқи ишлар вазири Сергей Лавров Ғарб давлатлари Молдовани “навбатдаги Украина” сифатида кўраётганини айтганди.
Изоҳ (0)