O‘zbekistonning to‘rt hududida elektr va gazdan noqonuniy foydalanganlar davlat va jamiyat manfaatlariga bir mlrd so‘mdan ziyod zarar yetkazdi.
Xabarga ko‘ra, iqtisodiy jinoyatlarga qarshi kurashish departamentining Buxoro shahar bo‘limi tomonidan o‘tkazilgan tergovga qadar tekshiruvda, “A.Yu.” MCHJ rahbari U.M. korxonaga qarashli issiqxonani o‘zboshimchalik bilan umumiy foydalanishdagi gaz tarmog‘iga ulab olib, 472,3 ming kub tabiiy gazdan noqonuniy foydalanganligi aniqlangan.
Shuningdek, Andijon tuman bo‘limi tomonidan o‘tkazilgan tergovga qadar tekshiruvda “E.D.” MCHJ rahbari va boshqalar korxonaning savdo va maishiy xizmat ko‘rsatish shoxobchasini tuman ETK bilan hech qanday shartnoma tuzmasdan umumiy foydalanishdagi elektr tarmog‘iga o‘zboshimchalik bilan ulab, 777,9 ming kVt/s elektr energiyasidan noqonuniy foydalanganligi aniqlangan.
Shu kabi, departamentning Chiroqchi tumani bo‘limi tomonidan o‘tkazilgan tergovga qadar tekshiruvda esa “S.o‘.” fermer xo‘jaligi rahbari Sh.X. xo‘jalik yer maydonini sug‘orish uchun tuman ETK bilan hech qanday shartnoma tuzmasdan quvvati 16 kVt/s bo‘lgan suv nasosni umumiy foydalanishdagi elektr tarmog‘iga o‘zboshimchalik bilan ulab, 207,3 ming kVt/s elektr energiyasidan noqonuniy foydalanganligi aniqlangan.
Shu bilan birgalikda, departamentning Toshkent tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda, fuqaro B.T. “Hasanboy” MFYdagi raqamsiz uyda issiqxona tashkil qilib, umumiy foydalanishdagi gaz quvuriga yer ostidan yashirincha ulanib olib, 103 ming kub tabiiy gazdan noqonuniy foydalanganligi aniqlangan.
Qayd etilishicha, ushbu qonun buzilish holatlari oqibatida, davlat va jamiyat manfaatlariga 1 milliard so‘mdan ortiq zarar yetkazilgan. Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)