O‘zbekistonda endi ma’muriy va fuqaroviy ishlarda ham yuridik yordam ko‘rsatiladi

Senatning navbatdagi yalpi majlisi oldidan Sud-huquq masalalari va korrupsiyaga qarshi kurashish qo‘mitasi majlisida “Davlat hisobidan yuridik yordam ko‘rsatish to‘g‘risida”gi qonun ko‘rib chiqildi, deb xabar bermoqda “Daryo” muxbiri. 

Qayd etilishicha, bugungi kunga qadar davlat hisobidan yuridik yordam faqat jinoyat ishlarini yuritishda ko‘rsatilib, ma’muriy va fuqarolik ishlarida nazarda tutilmagan. Yuridik yordam ko‘rsatadigan advokatlarni jalb etishning shaffof mexanizmi joriy etilmagani, ushbu sohani muvofiqlashtiruvchi yagona organ belgilanmagani sababli fuqarolarning, ayniqsa, ijtimoiy yordamga muhtoj qatlamning malakali yuridik yordamdan to‘liq foydalana olmagan.

Shuningdek, mazkur sohada qator korrupsiyaviy omillar mavjud bo‘lib, budjet mablag‘larining sarflanishi ustidan samarali nazorat o‘rnatilishiga to‘sqinlik qilgan.

Ta’kidlanishicha, mazkur qonun orqali muammolar bartaraf etiladi va sud jarayonlarida fuqarolarning huquq va qonuniy mafaatlari ishonchli himoyalanishi imkoniyati doirasi kengayadi.