Ўзбекистоннинг тўрт ҳудудида электр ва газдан ноқонуний фойдаланганлар давлат ва жамият манфаатларига бир млрд сўмдан зиёд зарар етказди.
Хабарга кўра, иқтисодий жиноятларга қарши курашиш департаментининг Бухоро шаҳар бўлими томонидан ўтказилган терговга қадар текширувда, “А.Ю.” МЧЖ раҳбари У.М. корхонага қарашли иссиқхонани ўзбошимчалик билан умумий фойдаланишдаги газ тармоғига улаб олиб, 472,3 минг куб табиий газдан ноқонуний фойдаланганлиги аниқланган.
Шунингдек, Андижон туман бўлими томонидан ўтказилган терговга қадар текширувда “Э.Д.” МЧЖ раҳбари ва бошқалар корхонанинг савдо ва маиший хизмат кўрсатиш шохобчасини туман ЭТК билан ҳеч қандай шартнома тузмасдан умумий фойдаланишдаги электр тармоғига ўзбошимчалик билан улаб, 777,9 минг кВт/с электр энергиясидан ноқонуний фойдаланганлиги аниқланган.
Шу каби, департаментнинг Чироқчи тумани бўлими томонидан ўтказилган терговга қадар текширувда эса “С.ў.” фермер хўжалиги раҳбари Ш.Х. хўжалик ер майдонини суғориш учун туман ЭТК билан ҳеч қандай шартнома тузмасдан қуввати 16 кВт/с бўлган сув насосни умумий фойдаланишдаги электр тармоғига ўзбошимчалик билан улаб, 207,3 минг кВт/с электр энергиясидан ноқонуний фойдаланганлиги аниқланган.
Шу билан биргаликда, департаментнинг Тошкент туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда, фуқаро Б.Т. “Ҳасанбой” МФЙдаги рақамсиз уйда иссиқхона ташкил қилиб, умумий фойдаланишдаги газ қувурига ер остидан яширинча уланиб олиб, 103 минг куб табиий газдан ноқонуний фойдаланганлиги аниқланган.
Қайд этилишича, ушбу қонун бузилиш ҳолатлари оқибатида, давлат ва жамият манфаатларига 1 миллиард сўмдан ортиқ зарар етказилган. Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)