Birlashgan Millatlar Tashkiloti (BMT) Turkiyadagi vayronkor zilzila oqibatlarini bartaraf etish va besh milliondan ortiq aholiga yordam ko‘rsatish uchun uch oy ichida bir milliard dollar yig‘ish kerakligi haqida murojaat bilan chiqdi. Murojaat tashkilot saytida e’lon qilindi.
Unda aniqlik kiritilishicha, yig‘ilgan pullar yordam tashkilotlariga uy-joy, oziq-ovqat xavfsizligi va ta’lim bo‘yicha hukumat choralarini qo‘llab-quvvatlash uchun o‘z faoliyatini qisqa fursatda kuchaytirishga imkon beradi.
“Turkiya xalqi so‘z bilan ifodalab bo‘lmaydigan yurak og‘rig‘ini boshdan kechirdi. Men o‘zlarining shok kechinmalari va vayronagarchiliklar haqida aytib bergan oilalarni tingladim. Biz ularni qiyin paytlarda qo‘llab-quvvatlashimiz va zarur yordamni ko‘rsatishimiz kerak”, — dedi BMT bosh kotibning gumanitar masalalar bo‘yicha o‘rinbosari va favqulodda yordam koordinatori Martin Griffits. U o‘tgan hafta Turkiyaga tashrif buyurgandi.
Turkiya hukumati ma’lumotlariga ko‘ra, mamlakatdagi 9 milliondan ortiq odam tabiiy ofatdan bevosita jabr ko‘rgan. Halok bo‘lganlar soni 38 ming kishidan oshdi va bu ko‘rsatkich kundan-kunga ortib bormoqda.
6-fevral kuni Turkiya janubi-sharqidagi Qahramonmarash viloyatida 7,8 va 7,6 magnitudali zilzilalar to‘qqiz soatlik interval bilan sodir bo‘ldi. Zilzila kuchi qo‘shni davlatlar, jumladan Suriyada ham sezildi.
Izoh (0)