Turkiya prezidenti Rajab Toyyib Erdo‘g‘on Turkiyadagi zilzilalar kuchini atom bombasi portlashiga qiyosladi, deb yozmoqda Deutsche Welle.
Turkiya rahbari bu haqda poytaxt Anqaradagi Tabiiy ofatlar va favqulodda vaziyatlarni boshqarish bo‘yicha Prezidiumda (AFAD) bo‘lib o‘tgan yig‘ilishdan so‘ng gapirgan. Erdo‘g‘on Turkiya janubidagi yuz minglab binolar yashash uchun yaroqsiz holga kelgani, 2,2 milliondan ortiq odam zilziladan jabr ko‘rgan hududlarni tark etganini aytdi.
“Dunyodagi barcha mutaxassislarning umumiy fikriga ko‘ra, Qahramonmarashdagi zilzilalar o‘z ko‘lami, vayronkorligi va ketma-ket sodir bo‘lishi bilan istisnoli tabiiy hodisa sifatida baholanmoqda”, — deya Turkiya rahbarining so‘zlarini keltiradi TRT World.
Erdo‘g‘on 6-fevral kuni mintaqani larzaga solgan 7,7 va 7,6 magnitudali zilzilalar oqibatida 10 ta viloyat eng ko‘p zarar ko‘rganini ta’kidladi.
“Falokat maydoni dunyoning ko‘plab mamlakatlari hududidan oshib ketdi. Zilzila yer yuzasidagi shunday qisqa — 7 kilometr masofada sodir bo‘lganiga qaramay, insoniyat tarixidagi boshqa yirik zilzilalar bilan solishtirganda vayronagarchiliklar ko‘lamini sezilarli darajada oshirdi. Ketma-ket sodir bo‘lgan zilzilalar yuzlab eng kuchli atom bombalariga teng energiya chiqardi”, — dedi u.
Turkiya prezidentining so‘zlariga ko‘ra, tabiiy ofatda vayron bo‘lgan barcha binolarning 98 foizi 1999-yilgacha qurilgan — o‘sha yili Turkiyaning Marmara mintaqasida kuchli zilzila yuz bergan va 18 ming kishi halok bo‘lgandi. O‘sha paytdagi voqealar yanada qattiqroq, zilzilalarga chidamli qurilish me’yorlarining qabul qilinishiga olib kelgan. Erdo‘g‘on zilzila oqibatida vayron bo‘lgan yoki yashash uchun yaroqsiz holga kelgan barcha uy va ish joylarini qayta tiklashga hamda ularni egalariga topshirishga va’da berdi.
“Mart oyi boshidan zudlik bilan 30 ming uy qurilishini boshlaymiz. Maqsadimiz — bir yil ichida sifatli va xavfsiz binolarni qurishni yakunlash. Zilziladan jabr ko‘rgan hududlarda uy-joyga bo‘lgan ehtiyojni qondirishimiz kerak”, — dedi u. Erdo‘g‘on Turkiyaning Atrof-muhit, urbanizatsiya va iqlim o‘zgarishi vazirligi mintaqada yangi uylar va shaharlar qurilishi uchun tayyorgarlikni boshlayotganini qo‘shimcha qildi.
Eslatib o‘tamiz, Turkiya janubi-sharqida va Suriyada sodir bo‘lgan ketma-ket vayronkor zilzilalar qurbonlari soni 40 mingdan oshdi.
Izoh (0)