Yevrokomissiya Rossiyaga qarshi o‘ninchi sanksiyalar paketini e’lon qildi. Nimalar taqiqlanadi?

Yevropa komissiyasi Rossiyaga qarshi sanksiyalarning o‘ninchi paketini e’lon qildi. Yevrokomissiya prezidenti Ursula fon der Lyayyen videomurojaatida bu haqda ma’lumot berdi.

Yevropa Ittifoqidan Rossiyaga qiymati 11 milliard yevrodan ortiq bo‘lgan muhim texnologiyalar va sanoat mahsulotlarini eksport qilish taqiqlanadi. Rossiya iqtisodiyotiga maksimal darajada ta’sir o‘tkazish uchun Moskvaga zarur bo‘lgan sanoat tovarlarining ko‘p turlariga maqsadli ravishda cheklovlar joriy etiladi. 

“Muhim mahsulotlar qatoriga elektronika, transport vositalari, mashina qismlari, reaktiv dvigatellar kiradi”, — dedi Yevrokomissiya rahbari. 

Bundan tashqari, Rossiya harbiylariga o‘tkazilishi mumkin bo‘lgan qurilish tovarlariga cheklovlar joriy etish taklif qilinmoqda. Ikki tomonlama va ilg‘or texnologiyali mahsulotlar eksporti cheklanadi.

“Biz Rossiya qurol tizimlarida ishlatilishi mumkin bo‘lgan 47 ta elektron komponentlar uchun eksport nazoratini taklif qilamiz“, — deydi Ursuna fon der Lyayyen.

U mazkur chora yordamida Ukrainaga qarshi urushda jang maydonida qo‘llanilgan qurollarda topilgan barcha tovarlarni Rossiyaga sotish taqiqlanishini aytdi.

“Rossiya bu tovarlarni olishning boshqa yo‘llarini topolmasligiga ishonch hosil qilamiz”, — dedi siyosatchi.

Yevropa Ittifoqi tarixda birinchi marta sanksiyaga Rossiya tomonidan chetlab o‘tish uchun foydalaniladigan uchinchi davlat tuzilmalarini qo‘shdi. Jumladan, yettita Eron tashkiloti sanksiyalar qatoridan joy oldi. Yevrokomissiya Rossiyaga muhim texnologiyalarni yetkazib beruvchi davlatlarga qarshi sanksiyalarni davom ettirishga tayyor.

Rossiyaning siyosiy va harbiy rahbarlari bilan bir qatorda Putinning targ‘ibotchilarini ham sanksiyalar ro‘yxatiga kiritish taklif qilinmoqda. Gap 100 dan ortiq jismoniy shaxslar haqida ketmoqda. Sanksiyalarni chetlab o‘tishning oldini olish uchun yangi choralar qo‘llaniladi.

“Sanksiyalardan qochish uchun o‘z aktivlarini yashirish yoki sotishga urinayotgan oligarxlarni kuzatib boramiz. A’zo davlatlar bilan birgalikda Rossiya Markaziy bankining Yevropa Ittifoqidagi muzlatilgan barcha aktivlari haqida umumiy ma’lumot yaratamiz. Ukrainani qayta tiklashni moliyalashtirish uchun Rossiya davlat aktivlaridan foydalanish mumkinligini hisobga olsak, bu juda muhimdir”, — dedi Ursula fon der Lyayyen.

Ta’kidlanishicha, rossiyaliklarga strategik ahamiyatga ega Yevropa kompaniyalarida rahbarlik lavozimini egallash taqiqlanishi mumkin, Rossiyaning 4 ta bankiga nisbatan ham sanksiya qo‘llaniladi va ular SWIFT tizimidan uziladi.