Toshkent viloyati Bo‘stonliq tumanida qizlar Nexia-3 dan tanasini chiqarib, xavfli harakatlarni amalga oshirdi. Bu haqda viloyat Ichki ishlar bosh boshqarmasi axborot xizmati xabar berdi.
Bo‘stonliq tumanidagi tog‘ yo‘lida harakatlanayotgan avtomobildan qizlar harakat vaqtida tanalarini oynadan chiqarib, xavfli harakatlar qilgani aks etgan video tarqalgandi. Mazkur video yuzasidan viloyat Ichki ishlar bosh boshqarmasi Jamoat xavfsizlik boshqarmasi Yo‘l harakati xavfsizligi boshqarmasi tomonidan qidiruv-surishtiruv olib borildi. Natijada ushbu holatni Toshkent shahrida yashovchi 1993-yilda tug‘ilgan ayol fuqaro tomonidan mashina boshqarayotgan vaqtda sodir etilgani aniqlangan.
Holat bo‘yicha yo‘lovchilarning hayotini xavf ostiga qo‘yib, ularning tana qismini mashinadan chiqarib harakatlanishiga yo‘l qo‘ygani uchun haydovchiga nisbatan Maʼmuriy javobgarlik to‘g‘risidagi kodeksining 128-5-moddasiga ko‘ra, maʼmuriy bayonnoma rasmiylashtirilgan.
Shuningdek, transport vositasini muddatidan o‘tgan 5 ta qoidabuzarlik yuzasidan undirilmagan jarimalar borligi aniqlanib, avtomobil vaqtinchalik jarima maydoniga joylashtirilgan. Hozirda xavfli harakatlarni amalga oshirib, qoidabuzarlik sodir etgan 2 fuqaroning shaxsiga aniqlik kiritish ishlari olib borilmoqda.
Izoh (0)