Islom Maxachev Volkanovskini mag‘lub etgan bo‘lsa ham P4P reytingida 1-o‘ringa ko‘tarila olmadi. Bunga sabab nima?

UFC promousheni o‘z divizionlarining yangilangan reytingini e’lon qildi. 

P4P (Pound for pound) — UFC’ning vazn toifasidan qat’i nazar eng yaxshi jangchilari ro‘yxati hisoblanadi. Reytingga kirish uchun turli omillar hisobga olinadi: kamarlar, himoyalar soni, qarshilik darajasi va ishtirok sifati.

UFC 284 ga qadar Aleks Volkanovski birinchi o‘rin, Islom Maxachev esa ikkinchi o‘rinda edi. Maxachev turnirda Volkanovski ustidan g‘alaba qozonganidan so‘ng ham yetakchiga aylanmadi. Bu esa tuli muhokamalarga sabab bo‘ldi. Nega UFC uni eng yaxshi deb topmadi va bu tizim qanday ishlaydi?

P4P reytingining yangilangan top-5 ligi:

1. Aleksandr Volkanovski
2. Islom Maxachev
3. Leon Edvards
4. Kamaru Usmon
5. Israel Adesanya.

UFC’dagi P4P reytingi qanday tuziladi?

Reyting maxsus komissiya tomonidan tuziladi, uning tarkibiga nufuzli nashrlarning (ESPN, MMAJunkie, Tapology va boshqalar) eng yaxshi jurnalistlari kiradi. Ular ma’lum bir jangchining ishtirokiga qarab baho beradi. Eng yaxshilar divizionlarga bo‘linadi, umumiy reytingga esa 15 nafar jangchi kiradi. 

Ovoz berish jarayoni quyidagicha: UFC har hafta 30 nafar jurnalistga anketani to‘ldirish uchun yuboradi. Natijalar umumiy maxrajga qisqartiriladi va saytda e’lon qilinadi. Tarafkashlikni oldini olish uchun UFC xodimlari reyting tuzishda ishtirok etmaydi. 

P4P reytingi dastlab boksda paydo bo‘lgan: 1925-yilda nufuzli The Ring jurnali tomonidan marketing maqsadlarida tuzilgan yilning eng yaxshilari ro‘yxati turli bahs-munozaralarga sabab bo‘lgan. 

Ammo bu P4P’ning to‘liq reytingi bo‘lmagan. Yana bir urinish 60-yillarda kuzatilgan. Boks assotsiatsiyasi o‘rta vazn toifasi vakili Shugar Rey Robinsonning nufuzini ifodalash uchun turli toifadagi jangchilar ramziy reytingini ishlab chiqqan. Biroq odatiy formatdagi P4P reytingi 1990-yilda, aynan The Ring nashrida paydo bo‘lgan. 

UFC P4P reytingini 2013-yildan e’lon qila boshlagan. Dastlab unda o‘rta vazn chempioni Anderson Silva yetakchilik qilgan. 2020-yilgacha erkaklar va ayollar uchun umumiy reyting tuzilgan (ayollar o‘rtasida Ronda Rouzi yetakchi edi). Shundan so‘ng ro‘yxat jins bo‘yicha bo‘lindi: ayni vaqtda erkaklar reytingida Volkanovski, ayollardan iborat reytingda Amanda Nunyes yetakchilik qiladi. 

Nega Maxachev g‘alabadan so‘ng ham yetakchi bo‘la olmadi?

Islom Maxachev va Aleksandr Volkanovski o‘rtasidagi jang tarixga kirdi. Ilk bor P4P reytingi yetakchilari bir-biriga qarshi oktagonga chiqdi. UFC buni eng yaxshi jangchi unvoni uchun kurash sifatida baholadi — promoushen g‘alabadan so‘ng ijtimoiy tarmoqlarda Islomni reytingda birinchi o‘ringa ko‘tarilgani bilan tabrikladi. 

Jurnalistlarning qarori esa bochqacha bo‘ldi, Volkanovski reytingda yetakchi sifatida qoldi. Nufuzli Sherdog portali Maxachevni birinchi o‘rinda e’tirof etgan bo‘lsa-da, UFC’ning bu yurishi ko‘pchilikni hayratda qoldirdi. Promouter Kamil Gajiyev bunga Maxachevning ishonchsiz g‘alabasi sabab deb hisobladi:

“Bu munozaralar uchun mavzu, munozaralar esa bo‘lib turishi kerak. Islom Maxachev nomi qancha ko‘p tilga olinsa, shuncha yaxshi. Sababi, u hakamlar qaroriga ko‘ra g‘alaba qozondi. Volkanovski esa pastroq vazn toifasida chempion. Uning yo‘qligida vaqtinchalik titul uchun bahs o‘tkazilgan.

Islomning g‘alabasi to‘liq ustunlik bilan bo‘lmadi. Jangchi yutqazib qo‘yganiga qaramasdan reytingda raqibidan yuqori turibdi. Matematik jihatdan buning yomon joyi yo‘q. Maxachevning dominantligi va birinchi o‘ringa chiqishi — vaqt masalasidir”. 

Islom kutilganidan past natija ko‘rsatdi, biroq u 4 oy ichida reytining birinchi (Volkanovski) va uchinchi (Oliveyra) raqamlari ustidan g‘alabani qo‘lga kiritdi. Aleksandr yaxshi jang o‘tkazdi va g‘alaba qozonish ehtimoli ham bor edi. Shu bois, mutaxassislar uning birinchi o‘rindan tushishiga sabab ko‘rmadi. Bu esa Volkanovskining Maxachev bilan revansh jangi o‘tkazish ehtimolini yanada oshiradi. 

Islom Maxachevning o‘zi ham reytingdagi yetakchilik haqida gapirib o‘tdi

“Asosiysi, men 13 ming kilometr yo‘l bosib, ularning chempioni ustidan g‘alaba qozondim va boshimni tik tutgan holda kamarni olib, uyga qaytdim. Dog‘istonga nisbatan munosabat tufayli reytingda yetakchiga aylanolmadim? Balki. Men bunday o‘yinlarga aralashmayman. Agar reyting shu holida qoladigan bo‘lsa... U baribir bir kun o‘zgaradi. O‘zgarmasa, bilmadim bu haqida qanday o‘ylash kerak.

Men bordim va ularning chempionini yengdim. Buni reytingga qo‘shishadimi yoki yo‘qmi, farqi yo‘q. Muhimi, kamar mening yelkamda”.