“Bavariya” Chempionlar Ligasi 1/8 final dastlabki bahsida “PSJ”ni 1:0 hisobida mag‘lub etdi.
Myunxenliklar klubi barcha musobaqalar doirasidagi mag‘lubiyatsiz seriyasini 20 ta o‘yinga yetkazdi. So‘nggi bor Yulian Nagelsmann shogirdlari 17-sentabr kuni “Augsburg”ga yutqazib qo‘ygandi (0:1). Shundan keyin jamoa 16 g‘alaba va 4 durang qayd etdi.
Chempionlar Ligasida esa nemis klubi joriy mavsumdagi barcha 7 ta o‘yinni o‘z foydasiga hal qildi. To‘plar nisbati — 19:2.
“Bavariya”ning uchrashuvdagi yagona g‘alaba to‘pini “PSJ” sobiq hujumchisi Kingsli Koman kiritdi. Koman 2020-yilgi YCHL finalida ham parijliklar darvozasini ishg‘ol qilib, “Bavariya”ga kubokni taqdim etgandi.
“Bavariya” Chempionlar Ligasi pley-off bosqichida 12 marta dastlabki o‘yinni yutgan va ularning barchasida keyingi bosqichga chiqqan.
“PSJ” qatorasiga uchinchi o‘yinda mag‘lubiyatga uchradi. Avvalroq jamoa Fransiya Kubogida “Marsel”ga (1:2), chempionatda “Monako”ga (1:3) yutqazib qo‘ygandi.
Bunday omadsiz seriya Parij jamoasida 2020-yildan keyin ilk bor kuzatildi. O‘shanda klub “Bavariya”, “Lans” va “Marsel”ga imkoniyatni boy bergandi. “PSJ” keyingi o‘yinini 19-fevral kuni “Lill”ga qarshi o‘tkazadi.
“PSJ” 2023-yilda barcha musobaqalarda 11 ta o‘yin o‘tkazib, ularning 5 tasida mag‘lub bo‘ldi (5 g‘alaba, 1 durang). Jamoa 2022-yildagi 46 ta o‘yinda 4 bor yutqazgandi.
Lionel Messi “PSJ” safida Chempionlar Ligasi pley-off bosqichidagi uchinchi o‘yinda qatnashdi. Ularda argentinalik futbolchi birorta samarali harakat amalga oshira olmadi. O‘tgan mavsum u “Real”ga qarshi o‘yinlarda (1:0, 1:3) to‘liq harakat qilgan, biroq gol va assist amalga oshira olmagandi.
“PSJ” safida himoyachi Uorren Zair-Emeri asosiy tarkibda maydonga tushdi. 16 yosh-u 343 kunlik futbolchi Chempionlar Ligasi pley-off bosqichida asosiy tarkibda maydonga chiqqan musobaqa tarixidagi eng yosh o‘yinchiga aylandi.
Izoh (0)