FIFAda 14-fevral, seshanba kuni onlayn-yig‘ilish bo‘lib o‘tdi. Unda qator masalalar muhokama qilindi.
Rekord daromad
FIFA moliyaviy hisobotlarni e’lon qildi. Unga ko‘ra, tashkilot 2019—2022-yillar oralig‘ida 7,6 milliard dollar daromad qilgan. Bu rekord hisoblanadi. Shuningdek, FIFA 2023—2026-yillar oralig‘ida daromadni 11 milliard dollarga yetkazishni maqsad qilgani aytildi.
Saudiya Arabistoni klublar o‘rtasidagi JCH—2023 ga mezbonlik qiladi
Saudiya Arabistoni klublar o‘rtasidagi 2023-yilgi Jahon chempionatiga mezbonlik qiladi.
Musobaqa joriy yilning 12—22-dekabr kunlari o‘tkaziladi. Unda amaldagi formatda bo‘lgani kabi 7 ta jamoa ishtirok etadi.
Yangi formatdagi klublar mundiali
Futbol bo‘yicha klublar o‘rtasidagi Jahon chempionatining yangilangan formatiga oid ayrim tafsilotlar ma’lum qilindi.
Musobaqada 32 ta klub ishtirok etadi. Kvotalar esa quyidagicha taqsimlanadi:
- Yevropa — 12 ta klub
- Janubiy Amerika — 6
- Osiyo — 4
- Afrika — 4
- Shimoliy Amerika — 4
- Okeaniya — 1
- Mezbon jamoa — 1
Yangi formatdagi musobaqaning dastlabkisi 2025-yilning iyun-iyul oylarida o‘tkaziladi.
Boshqa ma’lumotlar
JCH—2026 mezbonlari Kanada, Meksika va AQSHga mundial yo‘llanmasi to‘g‘ridan-to‘g‘ri berilgani bois Shimoliy Amerika mintaqasiga ajratilgan kvotalar soni 6 tadan uchtaga qisqaradi.
JCH—2030 mezboni nomi 2024-yilning uchinchi kvartalida e’lon qilinadi. Mezbonlikka ariza topshirish esa 2023-yilning iyuniga qadar davom etadi.
Izoh (0)