Kataloniyaning “Barselona” jamoasi Ispaniya hakamlar qo‘mitasi amaldoriga pul to‘lab kelgani ma’lum bo‘ldi.
SER Catalunya nashriga tayanib, Marca’ning xabar berishicha, klub Xose Mariya Enrikes Negreyraga tegishli DASNIL 95 kompaniyasiga 1,4 million yevro o‘tkazgan. Ushbu pulni “Barselona” 2016-yildan 2018-yilga qadar uchga bo‘lib to‘lagan. O‘shanda Enrikes Negreyra RFEF texnik hakamlar qo‘mitasi vitse-prezidenti lavozimida ishlagan.
“Barselona” Negreyraning kompaniyasiga 2016-yilda 728 ming yevro, 2017-yilda 541,752 yevro va 2018-yilda 318,200 yevro o‘tkazgan. 2018-yilda mutaxassis iste’foga chiqqanidan so‘ng, ya’ni 2019-yilda yana 7,384 yevro ro‘yxatdan o‘tkazilgan.
Hozirda ishni Kataloniya prokuraturasi o‘rganmoqda. Negreyra allaqachon ko‘rsatma berib, to‘lovlar konsalting ishlari bilan bog‘liq ekanligini, hakamlik ishiga aloqasi yo‘qligini ta‘kidlagan.
Biroq sobiq vitse-prezident soliq idorasiga “ko‘k-anorranglilar”ga konsalting xizmati ko‘rsatganligini tasdiqlovchi hech qanday hujjat taqdim etmagan.
Mutaxassis 1994-yildan 2018-yilgacha Texnik hakamlar qo‘mitasi vitse-prezidenti lavozimida ishlagan.
Eslatib o‘tamiz, ushbu davrda kataloniyaliklarning prezidenti Xosep Mariya Bartomeu bo‘lgan. Sobiq prezident 2021-yil mart oyida hibsga olingan va 2020-yilning fevralida yuzaga kelgan “Barsageyt” mojarosi yuzasidan tergov boshlangan edi.
Izoh (0)