Futbol bo‘yicha 2022/23-yilgi mavsum qishki transferlar oynasi yakunlandi. Yanvar oyi natijalaridan barcha klub va futbolchilar qoniqish hosil qilmadi. Ko‘plab transferlar muvaffaqiyatli amalga oshirilgan bo‘lsa-da, ba’zi kelishuvlar faqat og‘zakiligicha qoldi. Quyida yanvar oyida amalga oshishi kutilgan, biroq natijasiz tugagan transferlar haqida so‘z boradi.
Milan Shkrinyar (“PSJ”ga o‘ta olmadi)
“Inter” himoyachisi Milan Shkrinyarning nihoyasiga yetayotgan shartnomasi hisobga olinsa, uning “PSJ”ga o‘tishi aniqdek tuyulgandi. Parijliklar ham 27 yoshli futbolchini o‘z safiga qo‘shib olmoqchiligini yashirmadi. Shkrinyarning o‘zi klublar muzokara o‘tkazayotganini tasdiqladi. Slovakiyalik futbolchi bir oyog‘i bilan “Park de Prens”da edi. Lekin ushbu transfer amalga oshmadi. “Nerazzuri” uning o‘rniga munosib o‘rinbosar topa olmagani uchun Milanni qo‘yib yubormadi. Ushbu hikoya ijobiy yakun topmadi: Fransiya chempioni himoyachini qo‘ldan chiqardi, Shkrinyardan esa “Inter”dagi sardorlik bog‘ichi olib qo‘yildi.
Sofyan Amrabat (“Barselona”ga o‘ta olmadi)
“Fiorentina” yarim himoyachisi Sofyan Amrabatning “Barselona”ga o‘tishi bilan bog‘liq vaziyat qisqa metrajli filmni yodga soladi. Italiya klubi sport direktori Daniel Pradening so‘zlariga ko‘ra, barcha ertalab soat 10:00 da boshlanib, yarim tunda o‘z nihoyasiga yetgan. Futbolchi “Barselona”ga o‘tish uchun mashg‘ulotlarda ishtirok etishdan bosh tortganidan so‘ng “Fiorentina” ham uni tarkibdan chetlashtirgan. Biroq transfer amalga oshmagach, Amrabat uzr so‘ragan.
Xulian Arauxo (“Barselona”ga o‘ta olmadi)
Transfer oynasi yakunlanishi arafasida kataloniyaliklar Ektor Belyerinni “Sporting”ga qo‘yib yubordi. “Ko‘k-anorranglilar” uning o‘rnini “Los-Anjeles Gelaksi” himoyachisi Xulian Arauxo bilan to‘ldirishni maqsad qilgan edi. Tomonlar muzokaralarni yakunlagan, barchasi kelishilgan edi, biroq transfer amalga oshmadi. Katalonlar transferni rasmiylashtirishga 18 soniyaga kechikdi va 21 yoshli iqtidor egasidan quruq qoldi. Xuddi shunga o‘xshash vaziyat 2017-yilda “Lester” bilan ham sodir bo‘lgandi. O‘shanda “tulkilar” Adrien Silvaning transferini rasmiylashtirishga 14 soniya kechikkandi. Ikkala vaziyatda ham FIFA transferlarni ro‘yxatga olmagan.
Nikolo Zaniolo (“Milan”ga o‘ta olmadi)
“Roma” yarim himoyachisi Nikolo Zaniolo bilan bog‘liq vaziyat qishki transfer oynasida Italiyada eng ko‘p muhokama qilindi. Futbolchi Rim klubini tark etishini ma’lum qildi, lekin yakunda hech qayerga keta olmadi. 23 yoshli futbolchini qo‘lga kiritish uchun “Milan” va “Bornmut” asosiy da’vogar edi. Futbolchi “rossoneri” tarkibiga o‘tmoqchi edi, mish-mishlarga qaraganda, og‘zaki kelishuv ham amalga oshgan. Lekin inglizlar rimliklarga yaxshiroq taklif bilan chiqqan. Italiyalik esa APLning autsayderi tarkibiga o‘tishdan bosh tortgan. Zaniolo oxirida rahbariyat tomonidan tanqid va muxlislar g‘azabidan boshqa narsaga erishmadi.
Nikolo baribir “Roma”ni tark etdi hamda Turkiyaning “Galatasaroy” jamoasi bilan shartnoma imzoladi.
Hakim Ziyosh (“PSJ”ga o‘ta olmadi)
Qishki transfer oynasida parijliklarning omadi kelmadi. Dastlab, “Inter”dan Shkrinyar transferi uchun rad javobini olgan bo‘lsa, keyinchalik “Chelsi” vingeri Hakim Ziyosh bilan ham shartnoma imzolay olmadi. “PSJ” barchasiga “aristokratlar” aybdorligi borasida bayonot berdi. Londonliklar “Benfika” a’zosi Enso Fernandes transferiga diqqatini qaratib, parijliklarga Ziyoshning transferi bo‘yicha noto‘g‘ri rasmiylashtirilgan hujjatlarni yuborgan. Inglizlar barcha hujjatlarni to‘g‘rilaganda esa kech bo‘lgan. Grem Potter qo‘l ostida o‘yin amaliyotiga ega bo‘layotganiga qaramasdan marokashlik futbolchi hamon “Chelsi”ni tark etish niyatida.
Moyses Kaysedo (“Arsenal”ga o‘ta olmadi)
“Arsenal” yanvar oyida “Brayton” vingeri Leandro Trossardni 24 million yevro evaziga xarid qildi. Futbolchining bosh murabbiy Roberto de Zerbi bilan ziddiyatga borgani transfer tezroq amalga oshishiga turtki bo‘ldi. “Kanonirlar” transfer oynasiga yakunlanishi arafasida “chaykalar”ning yana bir futbolchisi Moyses Kaysedoni ham o‘z safiga qo‘shib olmoqchi edi. “Arsenal” 21 yoshli xavbek uchun Trossardga to‘lagan pulidan ko‘proq narx taklif qilgan. Biroq “Brayton”ni bu qoniqtirmagan. Ekvadorlik futbolchi ijtimoiy tarmoqlarda muxlislar bilan xayrlashishga ishora ham qilayotgan edi. De Zerbi Kaysedo jamoaning muhim futbolchisi ekanligini ta’kidlaganidan so‘ng rahbariyat mutaxassisning aytganini qilishga qaror qildi.
Yannik-Ferreyra Karrasko (“Barselona”ga o‘ta olmadi)
Kataloniyaliklarning qishdagi asosiy maqsadlaridan biri “Atletiko” futbolchisi Yannik Karraskoni o‘z safiga qo‘shib olish edi. Dastlab, “ko‘k-anorranglilar” Memfis Depay transferiga Karraskoni qo‘shishni taklif qildi, biroq “matraschilar” buni rad etdi. “Barselona” 29 yoshli belgiyalikni sotib olishga ham tayyor edi, lekin bu ham amalga oshmadi. Karrasko ham “Barselona” safiga o‘tishga roziligini bildirgan edi. Ushbu transfer yozda amalga oshishi mumkin.
Izoh (0)