“Барселона”да янги можаро. Каталонлар Испания ҳакамлар қўмитаси вице-президентига 1,4 млн евро тўлагани айтилмоқда

Каталониянинг “Барселона” жамоаси Испания ҳакамлар қўмитаси амалдорига пул тўлаб келгани маълум бўлди.

SER Katalunya нашрига таяниб, Marca’нинг хабар беришича, клуб Хосе Мария Энрикес Негрейрага тегишли DASNIL 95 компаниясига 1,4 миллион евро ўтказган. Ушбу пулни “Барселона” 2016 йилдан 2018 йилга қадар учга бўлиб тўлаган. Ўшанда Энрикес Негрейра RFEF техник ҳакамлар қўмитаси вице-президенти лавозимида ишлаган.

“Барселона” Негрейранинг компаниясига 2016 йилда 728 минг евро, 2017 йилда 541,752 евро ва 2018 йилда 318,200 евро ўтказган. 2018 йилда мутахассис истеъфога чиққанидан сўнг, яъни 2019 йилда яна 7,384 евро рўйхатдан ўтказилган. 

Ҳозирда ишни Каталония прокуратураси ўрганмоқда. Негрейра аллақачон кўрсатма бериб, тўловлар консалтинг ишлари билан боғлиқ эканлигини, ҳакамлик ишига алоқаси йўқлигини таъкидлаган. 

Бироқ собиқ вице-президент солиқ идорасига “кўк-анорранглилар”га консалтинг хизмати кўрсатганлигини тасдиқловчи ҳеч қандай ҳужжат тақдим этмаган. 

Мутахассис 1994 йилдан 2018 йилгача Техник ҳакамлар қўмитаси вице-президенти лавозимида ишлаган. 

Эслатиб ўтамиз, ушбу даврда каталонияликларнинг президенти Хосеп Мария Бартомеу бўлган. Собиқ президент 2021 йил март ойида ҳибсга олинган ва 2020 йилнинг февралида юзага келган “Барсагейт” можароси юзасидан тергов бошланган эди.