Туркия президенти Ражаб Тоййиб Эрдўғон зилзилалардан сўнг Туркияга ёрдам кўрсатган барча давлатларга миннатдорлик билдирди. Бу ҳақда Anadolu хабар берди.
БАА ташаббуси билан ташкил этилган Жаҳон ҳукумати саммити иштирокчиларига йўллаган видеомурожаатида Эрдўғон “Туркия қийин пайтларда ёрдам қўлини чўзганларни унутмаслигини” таъкидлади.
“Айрим давлатлар Туркияга қутқарувчилар юборди, айримлари эса ёрдам йиғиш кампанияларини бошлаб, бирдамлик кўрсатди. Баъзи мамлакатлар Анқарани қўллаб-қувватлашини билдирди. Зилзила офати халқаро бирдамликнинг муҳимлигини яна бир бор исботлади”, — деди Туркия президенти.
Эрдўғон мамлакатда 13,5 миллион киши зилзила оқибатларини ҳис қилганини айтди.
“Олимлар зилзила кучи 500 та атом бомбаси портлашига тенг энергия чиқарганини айтди”, — деди у.
Сиёсатчи Туркия нафақат ўз тарихидаги, балки инсоният тарихидаги энг йирик табиий офатлардан бирига дуч келганини қўшимча қилди. Туркия ҳукуматининг Фавқулодда вазиятлар бошқармаси зилзила қурбонлари сони 31 974 кишига етганини маълум қилди.
Изоҳ (0)