AQSH prezidenti Jo Baydenning ma’muriyati Ukraina hukumatini urush traektoriyasini o‘zgartirish uchun hal qiluvchi daqiqa kelgani haqida ogohlantirdi, deb xabar bermoqda The Washington Post manbalariga tayanib.
Oq uy rasmiylarining fikricha, Rossiya, kutilayotganidek, bahorda hujum boshlaydi, Ukraina esa boy berilgan hududlarni qaytarib olish uchun qarshi hujumga o‘tishi mumkin. Yanvar oyida Kiyevga tashrif buyurgan AQSH rasmiylari Ukraina rasmiylariga kelgusi oylar juda muhim bo‘lishini aytgan.
Amerikalik harbiy tahlilchilarning fikricha, Ukraina qo‘shinlari uchun bir vaqtning o‘zida Donetskdagi Baxmutni (u yerda ko‘p oylardan beri shiddatli jang ketmoqda) himoya qilish va AQSH muhimroq deb hisoblagan hududlarni qaytarish uchun bahorgi qarshi hujumni boshlash qiyin bo‘ladi. WP suhbatdoshlarining ta’kidlashicha, agar Ukraina Rossiya qo‘shin yuborgan yo‘nalishda jang qilsa, bu Rossiya hukumatiga qo‘l keladi.
AQSH Kiyevga bosimni kuchaytirgan, chunki Oq uy uchun Kongressni Ukrainaga avvalgidek yordam berishga majburlash qiyinroq bo‘ladi, bunga sabab — ayrim respublikachilar yordamni qisqartirishni yoqlamoqda. Jo Bayden ma’muriyati hozirda Kongress bilan Ukrainaga 10 milliard dollar yordam ko‘rsatish ustida ishlamoqda. Yangi yordam paketi Rossiya bosqiniga bir yil to‘lishi munosabati bilan Rossiyaga qarshi yangi sanksiyalar qatorida e’lon qilinishi kutilmoqda.
AQSH rasmiylari Ukrainani imkon qadar uzoq vaqt davomida qo‘llab-quvvatlashga tayyorligini bildirish bilan bir vaqtda, ular yozgacha Kiyev Amerika yordamining amaldagi paketini tugatadi, shundan so‘ng mojaroni siyosiy yo‘llar bilan hal qilish qiyin bo‘ladi, deb ogohlantirmoqda.
Izoh (0)