JSST odamlar orasida o‘limga olib keladigan yangi virus tarqala boshlaganini ma’lum qildi

Jahon sog‘liqni saqlash tashkiloti (JSST) Marburg virusining tarixidagi birinchi tarqalishini qayd etdi. Bu haqda tashkilot saytida xabar berildi.

Ma’lum qilinishicha, hozirgacha virusdan kamida 9 kishi vafot etgan. Kasallik Ekvatorial Gvineyada aniqlangan, mamlakat rasmiylari kasallik tarqalayotganini tasdiqlagan. Hammasi bo‘lib kasallik 16 kishida qayd etilgan. Bemorlarda isitma, charchoq va qon qusish kabi xarakterli alomatlar kuzatilgan. Virus odamlarga kasallikka chalingan odam bilan bevosita yoki bilvosita aloqa qilish orqali yuqishi mumkin.

“Marburg virusi kasalligi gemorragik isitmani keltirib chiqaradigan o‘ta xavfli kasallik bo'lib, undan o‘lim darajasi 88 foizni tashkil qiladi. U Ebola virusi kasalligini keltirib chiqaradigan virus bilan bir oilaga tegishli. Ko‘pgina bemorlarda yetti kun ichida og‘ir gemorragik alomatlar paydo bo‘ladi. Virus odamlarga ko‘rshapalaklardan yuqadi va infeksiyaga chalingan odamlar bilan aloqa qilish orqali yuqadi”, — deyiladi tashkilot bayonotida.

Marburg kasalligi to‘satdan boshlanadi va tana haroratining keskin ko‘tarilishi, kuchli bosh og‘rig‘i bilan kechib, aksar hollarda o‘lim bilan yakunlanadi. Mushak og‘rig‘i xastalikning umumiy simptomdir. Uchinchi kuni qorin bo‘shlig‘ida og‘riq, ko‘ngil aynishi va qayt qilish rivojlanishi mumkin.