Turkiyaning Gaziantep viloyatidagi zilziladan katta zarar ko‘rgan Nurdagi shahri butunlay buzib tashlanadi va qayta quriladi. Bu haqda viloyat gubernatori Usmon Bilginga tayanib, NTV xabar berdi.
Zilziladan keyin sakkizinchi kuni shaharning yuz foiz hududi buzib tashlanishi, keyin esa shahar qayta tiklanishi ma’lum qilindi. Ayni paytda Nurdagida zilzila oqibatlarini bartaraf etish, chiqindilarni yig‘ish va qidiruv-qutqaruv ishlari davom etmoqda.
“Barcha qutqaruv jamoalarimiz birgalikda ishlaydi. Ularning barchasi qidiruv jarayoniga katta hissa qo‘shgan. Turkiyada shunday birlik va yaxlitlik bor ekan, Allohning izni bilan bu ofatlarni eng qisqa vaqt ichida yengamiz. Biz ko‘p odamlarni yo‘qotdik”, — deydi Usmon Bilgin.
Mahalliy manbalarga ko‘ra, shahar aholisi zilziladan oldin 40 ming kishini tashkil qilgan.
Eslatib o‘tamiz, 6-fevral kuni Turkiya va Suriyada ikkita kuchli zilzila sodir bo‘ldi. BMT qurbonlar soni 50 mingga yetishi mumkinligini taxmin qilmoqda. Statistik ma’lumotlarga ko‘ra, Turkiya va Suriyada qurbonlar soni 36 ming kishiga yetdi. Turkiyadagi zilzila qurbonlari soni 31 643 nafardan oshdi. Suriyada esa bu ko‘rsatkich 4 300 ga yetdi.
Izoh (0)