“Дарё” нашри 14 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия денгиз флоти тактик ядро қуроллари билан денгизга чиқишни бошлади
Россия Шимолий флотининг кемалари 30 йил ичида биринчи марта бортида тактик ядро қуроллари билан денгизга чиқишни бошлади, деб хабар бермоқда Норвегия разведка хизмати (NIS) ўзининг йиллик ҳисоботида.
Ҳужжатда айтилишича, совет даврида Шимолий флотнинг ҳарбий кемалари мунтазам равишда тактик ядро қуроллари билан денгизга чиққан, бироқ Совуқ уруш давридан бери бундай ҳолатлар кузатилмаган. Разведка маълумотларига кўра, Украинада уруш бошланганидан кейин “Россия учун ядро қуролининг аҳамияти сезиларли даражада ошди”.
“Ядро салоҳиятининг марказий қисми Шимолий флотнинг сувости кемаларида ва ерусти кемаларида жойлашган. Ядро қуроллари НАТО давлатлари иштирок этиши мумкин бўлган операцияларда айниқса жиддий хавф туғдиради”, — дейилади Норвегия разведкаси ҳисоботида.
Шимолий флот — бу Североморскда жойлашган Россия денгиз флотининг тезкор-стратегик тузилмаси. Флот таркибига 80 дан ортиқ сувости кемалари ва ерусти кемалари, шу жумладан, гипертовушли қурол ташувчилар киради.
Украина учун уруш траекториясини ўзгартириши мумкин бўлган дақиқалар яқинлашмоқда. АҚШ ҳукуматидан 10 млрд долларлик сўнгги ёрдам ва Россияга қаратилиши мумкин бўлган янги санкциялар
АҚШ президенти Жо Байденнинг маъмурияти Украина ҳукуматини уруш траекториясини ўзгартириш учун ҳал қилувчи дақиқа келгани ҳақида огоҳлантирди. Бу ҳақда The Washington Post манбаларига таяниб хабар бермоқда.
Оқ уй расмийларининг фикрича, Россия, кутилаётганидек, баҳорда ҳужум бошлайди, Украина эса бой берилган ҳудудларни қайтариб олиш учун қарши ҳужумга ўтиши мумкин.
Америкалик ҳарбий таҳлилчиларнинг фикрича, Украина қўшинлари учун бир вақтнинг ўзида Донецкдаги Бахмутни (у ерда кўп ойлардан бери шиддатли жанг кетмоқда) ҳимоя қилиш ва АҚШ муҳимроқ деб ҳисоблаган ҳудудларни қайтариш учун баҳорги қарши ҳужумни бошлаш қийин бўлади.
WP суҳбатдошларининг таъкидлашича, агар Украина Россия қўшин юборган йўналишда жанг қилса, бу Россия ҳукуматига қўл келади.
АҚШ Киевга босимни кучайтирган, чунки Оқ уй учун Конгрессни Украинага аввалгидек ёрдам беришга мажбурлаш қийинроқ бўлади, бунга сабаб — айрим республикачилар ёрдамни қисқартиришни ёқламоқда.
Жо Байден маъмурияти ҳозирда Конгресс билан Украинага 10 миллиард доллар ёрдам кўрсатиш устида ишламоқда. Янги ёрдам пакети Россия босқинига бир йил тўлиши муносабати билан Россияга қарши янги санкциялар қаторида эълон қилиниши кутилмоқда.
АҚШ расмийлари Украинани имкон қадар узоқ вақт давомида қўллаб-қувватлашга тайёрлигини билдириш билан бир вақтда, улар ёзгача Киев Америка ёрдамининг амалдаги пакетини тугатади, шундан сўнг можарони сиёсий йўллар билан ҳал қилиш қийин бўлади, деб огоҳлантирмоқда.
Ўзбекистонда “самосуд” жараёнларини кимлар ташкиллаштирмоқда
Тошкент вилояти Қибрай туманида икки йигит тенгдошларини дўппослаб, безорилик жиноятини содир этгани ҳақида хабар берилганди. Вилоят Ички ишлар бош бошқармаси суриштирув ишлари натижасини эълон қилди.
Унга кўра, номаълум шахслар 22 январь куни Қибрай тумани ҳудудида Telegram-бот орқали топшириқ олиб, гиёҳвандлик моддаларини тарқатиш билан шуғулланганларни уриб, тан жароҳати етказган ва ушбу ҳолатни видео тасвирга олган.
Мазкур ҳолат юзасидан ИИBB ва бошқа ҳамкорликдаги органлар томонидан ўтказилган тезкор тадбирда 1997—2003- йилда туғилган ўндан ортиқ шахслар гумонланувчи сифатида ушланган. Уларга нисбатан қамоқ эҳтиёт чораси қўлланган ва жиноят иши қўзғатилиб, тергов ҳаракатларига киришилган.
Маълум қилинишича, гумонланувчилар маълум моддий манфаат эвазига шу каби бир нечта воқеада иштирок этиб, тан жароҳати етказиш ҳолати акс эттирилган видео ёзувларни ижтимоий тармоқ орқали буюртмачига етказиб берган. Ҳозирда тергов-суриштирув ишлари давом этмоқда.
Изоҳ (0)