Туркиянинг Газиантеп вилоятидаги зилзиладан катта зарар кўрган Нурдаги шаҳри бутунлай бузиб ташланади ва қайта қурилади. Бу ҳақда вилоят губернатори Усмон Билгинга таяниб, НTV хабар берди.
Зилзиладан кейин саккизинчи куни шаҳарнинг юз фоиз ҳудуди бузиб ташланиши, кейин эса шаҳар қайта тикланиши маълум қилинди. Айни пайтда Нурдагида зилзила оқибатларини бартараф этиш, чиқиндиларни йиғиш ва қидирув-қутқарув ишлари давом этмоқда.
“Барча қутқарув жамоаларимиз биргаликда ишлайди. Уларнинг барчаси қидирув жараёнига катта ҳисса қўшган. Туркияда шундай бирлик ва яхлитлик бор экан, Аллоҳнинг изни билан бу офатларни энг қисқа вақт ичида енгамиз. Биз кўп одамларни йўқотдик”, — дейди Усмон Билгин.
Маҳаллий манбаларга кўра, шаҳар аҳолиси зилзиладан олдин 40 минг кишини ташкил қилган.
Эслатиб ўтамиз, 6 февраль куни Туркия ва Сурияда иккита кучли зилзила содир бўлди. БМТ қурбонлар сони 50 мингга етиши мумкинлигини тахмин қилмоқда. Статистик маълумотларга кўра, Туркия ва Сурияда қурбонлар сони 36 минг кишига етди. Туркиядаги зилзила қурбонлари сони 31 643 нафардан ошди. Сурияда эса бу кўрсаткич 4 300 га етди.
Изоҳ (0)